അവിവവാഹിതരായ പുരുഷന്മാര്ക്ക് കരസേനയില് 10+2 ടെക്നിക്കല് എന്ട്രിയിലൂടെ (ടിഇഎസ്-53) സൗജന്യ ബിടെക് പഠന പരിശീലനങ്ങള് നേടി ലഫ്റ്റനന്റ് പദവിയില് ഓഫീസറാകാം. പരിശീലന ചെലവുകള് സര്ക്കാര് വഹിക്കും. പരിശീലനകാലം പ്രതിമാസം 56100 രൂപ സ്റ്റൈപ്പന്റുണ്ട്. മൊത്തം 4 വര്ഷമാണ് പഠന പരിശീലനങ്ങള്. ജെഇഇ െമയിന് 2024 പരീക്ഷയില് യോഗ്യത നേടുന്നവര്ക്കാണ് അവസരം. ആകെ 90 ഒഴിവുകളാണുള്ളത്.
യോഗ്യത: ഭാരത പൗരന്മാര്ക്ക് അപേക്ഷിക്കാം. ഫിസിക്സ്, കെമിസ്ട്രി, മാത്തമാറ്റിക്സ് വിഷയങ്ങള്ക്ക് മൊത്തം 60 ശതമാനം മാര്ക്കില് കുറയാതെ പ്ലസ്ടു/ഹയര് സെക്കന്ററി/തത്തുല്യ പരീക്ഷ വിജയിച്ചിരിക്കണം. പ്രായപരിധി 16 1/2 വയസ് തികഞ്ഞിരിക്കണം. 19 1/2 വയസ് കവിയാനും പാടില്ല. 2006 ജനുവരി രണ്ടിന് മുമ്പോ 2009 ജനുവരി ഒന്നിന് ശേഷമോ ജനിച്ചവരാകരുത്. മെഡിക്കല്, ഫിസിക്കല് ഫിറ്റ്നസുണ്ടായിരിക്കണം.
വിശദവിവരങ്ങളടങ്ങിയ വിജ്ഞാപനം www.joinindianarmy.nic.in ല്നിന്നും ഡൗണ്ലോഡ്ചെയ്യാം. നിര്ദ്ദേശാനുസരണം ഓണ്ലൈനായി നവംബര് 6 നകം അപേക്ഷ സമര്പ്പിക്കണം.
സെലക്ഷന്: മെരിറ്റടിസ്ഥാനത്തില് അപേക്ഷകരുടെ ചുരുക്കപ്പട്ടിക തയ്യാറാക്കി സര്വ്വീസസ് സെലക്ഷന് ബോര്ഡ് (എസ്എസ്ബി) മുമ്പാകെ ബെംഗളൂരു, ഭോപാല്, ജലന്ധര്, പ്രയാഗ് രാജ് (യുപി) എന്നിവിടങ്ങളിലായി ഇന്റര്വ്യുവിന് ക്ഷണിക്കും.
5 ദിവസത്തോളം നീളുന്ന ഇന്റര്വ്യുവില് സൈക്കോളജിക്കല് ടെസ്റ്റ്, ഗ്രൂപ്പ് ടെസ്റ്റ് അടക്കമുള്ള പരീക്ഷകളുണ്ടാവും. രണ്ട് ഘട്ടമായി നടത്തുന്ന പരീക്ഷയില് ഒന്നാംഘട്ടം വിജയിക്കുന്നവരെയാണ് രണ്ടാംഘട്ട പരീക്ഷയില് പങ്കെടുപ്പിക്കുക. സെലക്ഷന് നടപടികള് വിജ്ഞാപനത്തിലുണ്ട്.
തെരഞ്ഞെടുക്കപ്പെടുന്നവര്ക്ക് 4 വര്ഷത്തെ പരിശീലനം നല്കും. ഒന്നാംഘട്ട അടിസ്ഥാന മിലിട്ടറി പരിശീലനവും എന്ജിനീയറിങ് പഠന പരിശീലനങ്ങളും പൂനെ, സെക്കന്ഡറാബാദ് കേന്ദ്രങ്ങളില് ലഭിക്കും. രണ്ടാംഘട്ട പരിശീലനം ഡറാഡൂണിലെ ഇന്ത്യന് മിലിട്ടറി അക്കാഡമിയില്വച്ചാണ് നല്കുക. നാലുവര്ഷത്തെ പഠന പരിശീലനങ്ങള് വിജയകരമായി പൂര്ത്തിയാക്കുന്നവര്ക്ക് എന്ജിനീയറിങ് ബിരുദം സമ്മാനിക്കുന്നതോടൊപ്പം 56100 രൂപ അടിസ്ഥാന ശമ്പളത്തില് ലഫ്റ്റനന്റ് പദവിയില് ഓഫീസറായി നിയമിക്കുന്നതാണ്. ക്ഷാമബത്ത, യൂണിഫോം അലവന്സ്, റേഷന് അടക്കം നിരവധി ആനുകൂല്യങ്ങളും ലഭിക്കും.
