തിരുവനന്തപുരം: വയനാട്ടിലെ പുനരധിവാസത്തിനും പുനര്‍നിര്‍മ്മാണത്തിനും മറ്റുമായി നിലവില്‍ ലഭ്യമായ തുക പര്യാപ്തമല്ലന്ന് സര്‍ക്കാര്‍. അതിനാല്‍ മുഖ്യമന്ത്രിയുടെ ദുരിതാശ്വസനിധിയിലേക്ക് കൂടുതല്‍ സംഭാവനകള്‍ നല്‍കി പുനരധിവാസ പുനര്‍നിര്‍മ്മാണ പ്രവര്‍ത്തനത്തിന്റെ ഭാഗമാകണമെന്നും ധനകാര്യവകുപ്പ് കുറിപ്പില്‍ അറിയിച്ചു.
വയനാട് ദുരന്ത പശ്ചാത്തലത്തില്‍ 2024 ജൂലൈ 30 മുതല്‍ സിഎംഡിആര്‍എഫ് അക്കൗണ്ടുകളിലേക്ക് നല്‍കിയ പുതിയ സംഭാവനകള്‍ വയനാട്ടിലെ രക്ഷാപ്രവര്‍ത്തനത്തിനും ദുരിതാശ്വാസത്തിനും പുനരധിവാസത്തിനും പുനര്‍നിര്‍മ്മാണത്തിനും വേണ്ടിയാണ് ഉപയോഗിക്കുന്നത്. മുഖ്യമന്ത്രിയുടെ ദുരിതാശ്വാസനിധിയുമായി ബന്ധപ്പെട്ട ബാങ്ക് അക്കൗണ്ടുകളിലെ ക്യുആര്‍ കോഡ് തെറ്റായി നിര്‍മ്മിക്കുവാനും വ്യാജ കോഡുകള്‍ ഉപയോഗിക്കാനുമുള്ള സാധ്യത മുന്‍കൂട്ടികണ്ട് സിഎംഡിആര്‍എഫ് ഡൊണേഷന്‍ പോര്‍ട്ടലില്‍ നിന്നും ബാങ്കുകളുടെ ക്യുആര്‍ കോഡുകള്‍ ഒഴിവാക്കിയിരുന്നു
മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള ധനസമാഹരണം കൂടാതെ ചില രാഷ്‌ട്രീയ, സാമൂഹിക, സാംസ്‌കാരിക, സംഘടനകളും കൂട്ടായ്‌മകളും സന്നദ്ധ പ്രവര്‍ത്തകരും മറ്റും ദുരിതബാധിതരെ സഹായിക്കുന്നതിനായി ധനസമാഹരണം നടത്തി വരുന്നതായി ശ്രദ്ധയില്‍പ്പെട്ടിട്ടുണ്ട്. ഇത്തരം പ്രവര്‍ത്തനങ്ങള്‍ നിരുല്‍സാഹപ്പെടുത്തേണ്ടതാണ്.
https://donation.cmdrf.kerala.gov.in എന്ന പോര്‍ട്ടലിലൂടെ ഓണ്‍ലൈനായും പോര്‍ട്ടലില്‍ നല്‍കിയിട്ടുള്ള ബാങ്ക് അക്കൗണ്ടുകളിലേക്കും ട്രഷറിയിലൂടെയും ടി.പി 80 എന്ന ട്രഷറി അക്കൗണ്ടിലേക്കും യുപിഐ വഴിയും, മുഖ്യമന്ത്രിയുടെ ഓഫീസില്‍ നേരിട്ടും മുഖ്യമന്ത്രിയുടെ ദുരിതാശ്വസനിധിയിലേക്ക് സംഭാവനകള്‍ നല്‍കുന്നതിനുള്ള സൗകര്യം സജ്ജമാക്കിയിട്ടുള്ള സാഹചര്യത്തില്‍ മറ്റ് തരത്തിലുള്ള ധനസമാഹരണ മാര്‍ഗ്ഗത്തില്‍ നിന്നും വിട്ടു നില്‍ക്കണം.
വയനാട്ടിലെ രക്ഷാപ്രവര്‍ത്തനത്തിനും ദുരിതാശ്വസത്തിനും പുനരധിവാസത്തിനും പുനര്‍നിര്‍മ്മാണത്തിനും വേണ്ടി ദുരിതാശ്വാസനിധി (സി.എം.ഡി.ആര്‍.എഫ്) ലേക്ക് നല്‍കുന്ന സംഭാവനകളുടെ കണക്ക് (ദിവസം തോറും ഉള്ള അപ്‌ഡേഷന്‍സ് സഹിതം) https://donation.cmdrf.kerala.gov.in എന്ന വെബ്‌സൈറ്റില്‍ ലഭ്യമാണ്. എന്നതാണ് പത്രക്കുറിപ്പില്‍ പറയുന്നത്.
വയനാട് ദുരന്തത്തില്‍ കേന്ദ്ര സഹായം അടിയന്തരമായി ലഭ്യമാക്കണമെന്നും ജി എസ് ടി യുമായി ബന്ധപ്പെട്ട് കേരളം ഉന്നയിച്ച കാര്യങ്ങളില്‍ തീരുമാനം വേഗത്തില്‍ എടുക്കണമെന്നും ആവശ്യപ്പെട്ട് സംസ്ഥാന സര്‍ക്കാരിന്റെ ഡല്‍ഹിയിലെ പ്രത്യേക പ്രതിനിധി പ്രൊഫ. കെ വി തോമസ് കേന്ദ്ര ധനകാര്യ മന്ത്രി നിര്‍മ്മല സീതാരാമനുമായി ചര്‍ച്ച നടത്തി.
വയനാട് സഹായം ലഭ്യമാക്കുന്ന കാര്യത്തില്‍ പ്രധാനമന്ത്രിയുമായി സംസാരിച്ച് എത്രയും വേഗം തീരുമാനം എടുക്കുമെന്ന് കെ.വി തോമസിന് കേന്ദ്രമന്ത്രി ഉറപ്പ് നല്‍കി. കേരളത്തിന് ശേഷം പ്രകൃതി ദുരന്തം ഉണ്ടായ പല സംസ്ഥാനങ്ങള്‍ക്കും കേന്ദ്ര സഹായം ലഭ്യമായിട്ടും കേരളത്തിന് ഇപ്പോഴും സഹായം ലഭിച്ചിട്ടില്ലെന്ന് കെ.വി തോമസ് കേന്ദ്രമന്ത്രിയുടെ ശ്രദ്ധയില്‍പ്പെടുത്തി. കേന്ദ്ര- കേരള മാനദണ്ഡങ്ങളില്‍ ചില വ്യത്യാസങ്ങള്‍ ഉള്ളതുകൊണ്ടാണ് ഈ കാലതാമസം എന്ന് കേന്ദ്രമന്ത്രി അറിയിച്ചു.
