ലോക്സഭാ തെരഞ്ഞെടുപ്പ് കഴിഞ്ഞപ്പോള്‍ ജയിച്ച് അധികാരത്തിലെത്തിയ ബിജെപി അല്ല കോണ്‍ഗ്രസാണ് യഥാര്‍ത്ഥ വിജയി എന്നാണ് ചിലര്‍ കൊട്ടിഘോഷിച്ചത്. കോണ്‍ഗ്രസിന്റേയും രാഹുല്‍ ഗാന്ധിയുടേയും മഹത്തായ വിജയം എന്നു പറഞ്ഞ് ആരവം മുഴക്കി. ബിജെപിക്ക് ഒറ്റയ്‌ക്ക് ഭൂരിപക്ഷം ഇല്ല എന്നായിരുന്നു വ്യാഖ്യാനം. കോണ്‍ഗ്രസിനെ പാടിപ്പുകഴ്‌ത്താന്‍ മാധ്യമങ്ങള്‍ മത്സരിച്ചു. പുകഴ്‌ത്തലില്‍ പുളകിതനായ പ്രതിപക്ഷനേതാവ് വിദേശത്തുപോയി പ്രധാനമന്ത്രിയേയും രാജ്യത്തെത്തന്നെയും അപമാനിച്ചു നടന്നു. മോദി പ്രഭാവം മങ്ങി, ഇനി രാഹുല്‍കാലം എന്നെല്ലാം ചില പ്രമുഖ മാധ്യമങ്ങള്‍ അച്ചു നിരത്തി. ഹരിയാനയിലേയും ജമ്മു കശ്മീരിലെയും നിയമസഭാ തെരഞ്ഞെടുപ്പുഫലം രാഹുല്‍ സ്തുതിക്ക് ശക്തികൂട്ടാനുള്ള അവസരമാകുമെന്ന് അവര്‍ പ്രതീക്ഷിച്ചു. അത് അമിത പ്രതീക്ഷ എന്നു പറയാനാകില്ലായിരുന്നു. ഇരു സംസ്ഥാനങ്ങളിലേയും രാഷ്‌ട്രീയ സാഹചര്യം ബിജെപിക്ക് അനുകൂലമല്ലായിരുന്നു. സകല എക്സിറ്റ്പോളും ഹരിയാനയില്‍ കോണ്‍ഗ്രസിന്റെ വന്‍ വിജയം പ്രഖ്യാപിക്കുകയും പോസ്റ്റല്‍ ബാലറ്റ് എണ്ണിയപ്പോള്‍ അവര്‍ മുന്നില്‍ വരികയും ചെയ്തതോടെ എഐസിസി ആസ്ഥാനത്ത് പടക്കം പൊട്ടിച്ചു മധുരം വിതരണം ചെയ്തും വിജയാഘോഷം നടത്തി. എന്നാല്‍ അന്തിമഫലം വന്നപ്പോള്‍ കോണ്‍ഗ്രസ് എട്ടു നിലയില്‍ പൊട്ടി. ഹരിയാനയില്‍ ബിജെപി ഹാട്രിക് വിജയവുമായി ഭരണം നിലനിര്‍ത്തി. ജമ്മു കശ്മീരില്‍ വെറും ആറു സീറ്റില്‍ ഗ്രാന്‍ഡ് ഓള്‍ഡ് പാര്‍ട്ടി ചുരുങ്ങി. ജമ്മു കശ്മീര്‍ ഏറ്റവുംകൂടുതല്‍ കാലം ഭരിച്ച കോണ്‍ഗ്രസ് പ്രാദേശിക പാര്‍ട്ടിയായ നാഷണന്‍ കോണ്‍ഫറന്‍സിന്റെ ജൂനിയര്‍ പങ്കാളിമാത്രം.
ഹരിയാനയില്‍ മൂന്നാം തവണ തെരഞ്ഞെടുപ്പിനൊരുങ്ങുമ്പോള്‍ ബിജെപിക്ക് പ്രതികൂല ഘടകങ്ങളായിരുന്നു ചുറ്റും. ഭരണവിരുദ്ധ വികാരം, കര്‍ഷക പ്രക്ഷോഭം, ഗുസ്തിക്കാരുടെ ലഹള, അഗ്നിവീര്‍ റിക്രൂട്ട്മെന്റ്… ഇങ്ങനെ നിരവധി പ്രശ്‌നങ്ങളില്‍ ബിജെപിയെ തോല്‍പ്പിക്കാനാകുമെന്ന ചിന്തയില്‍ ഒട്ടേറെ വിഷയങ്ങള്‍ കോണ്‍ഗ്രസ് കരുതിവച്ചിരുന്നു. പക്ഷേ ഒന്നും ഏശിയില്ല. ഇത്രയും ഭരണവിരുദ്ധ വികാരം ഉണ്ട് എന്ന് മാധ്യമങ്ങളും, കോണ്‍ഗ്രസും ഒക്കെ നാഴികയ്‌ക്ക് നാല്‍പത് വട്ടവും പറഞ്ഞിട്ടും ബിജെപി ജയിച്ചു. കോണ്‍ഗ്രസ് ഉയര്‍ത്തിയ ആരോപണങ്ങള്‍ എല്ലാം ഹരിയാനയിലെ ജനങ്ങള്‍ തള്ളിക്കളഞ്ഞു എന്നാണ് തെരഞ്ഞെടുപ്പു ഫലം വ്യക്തമാക്കുന്നത്. ബിജെപിക്ക് 2019 ല്‍ കിട്ടിയ 40 സീറ്റ് 48 ആയി ഉയര്‍ന്നു. ബിജെപിയുടെ വോട്ട് വിഹിതം 2019 ല്‍ 36.49% ആയിരുന്നു എങ്കില്‍ അത് 39.94% ആയും ഉയര്‍ന്നു.
ജമ്മു കശ്മീരില്‍ കോണ്‍ഗ്രസിന് ആകെ കിട്ടിയത് ആറു സീറ്റ്. കഴിഞ്ഞ തെരഞ്ഞെടുപ്പില്‍ 12 സീറ്റും 18% വോട്ട് വിഹിതവും ഉണ്ടായിരുന്നു. ഇത്തവണ കോണ്‍ഗ്രസിന്റെ വോട്ട് വിഹിതം 11.97% ആണ്. സഖ്യ കക്ഷികളുടെ ചെലവില്‍ വിരലിലെണ്ണാവുന്ന സീറ്റ് കിട്ടിയപ്പോള്‍ കശ്മീരില്‍ വിജയിച്ചു എന്ന് മൈക്ക് വച്ച് പ്രഖ്യാപിക്കുന്ന അല്പത്തമാണ് കാണുന്നത്.
തോറ്റു തുന്നം പാടിയിട്ടും കോണ്‍ഗ്രസ് പാഠം പഠിക്കുന്നില്ല എന്നതും കാണാതെ പോകരുത്. തോല്‍വിക്ക് കാരണം എന്ത് എന്ന് പഠിച്ച് പരിഹാരം കാണുന്നതിനു പകരം വോട്ടിങ് മെഷീനെ കുറ്റപ്പെടുത്തുകയാണവര്‍.
ലോക്സഭാ തെരഞ്ഞെടുപ്പില്‍ കോണ്‍ഗ്രസ് ചെറിയ മുന്നേറ്റം ഉണ്ടാക്കിയപ്പോള്‍ അത് ജനാധിപത്യത്തിന്റെ വിജയം എന്ന് പറഞ്ഞ് ആഘോഷിച്ചു. ഹരിയാനയിലെ ഫലം വന്നപ്പോള്‍ ജനാധിപത്യത്തിലും, തെരഞ്ഞെടുപ്പിലും വിശ്വാസം നഷ്ടമായി. കോണ്‍ഗ്രസ് മുക്തഭാരതം എന്ന ആഗ്രഹപൂര്‍ത്തീകരണം അസാധ്യമല്ല എന്ന സൂചനയാണ് ഹരിയാനയും ജമ്മുകാശ്മീരും നല്‍കുന്നത്‌
