വനിതാ ടേബിള്‍ ടെന്നിസില്‍ ചരിത്ര വെങ്കലം

അസ്റ്റാന: ഏഷ്യന്‍ ടേബിള്‍ ടെന്നിസിന്റെ ചിരിത്രത്തില്‍ ആദ്യമായി മെഡല്‍ സ്വന്തമാക്കി ഭാരത വനിതാ ടീം. കടുത്ത പോരാട്ടത്തിനൊടുവില്‍ ദക്ഷിണ കൊറിയയെ 3-2ന് തോല്‍പ്പിച്ച ഭാരതം വെങ്കലം സ്വന്തമാക്കി.

ആദ്യ രണ്ട് കളികള്‍ നേടിയെടുത്ത ഭാരതം തുടരെ രണ്ട് മത്സരങ്ങള്‍ അടിയറവച്ച് മത്സരം വീണ്ടും കടുപ്പിച്ചു. ഒടുവില്‍ അയ്ഹിക മുഖര്‍ജിയുടെ രണ്ടാം ജയത്തോടെ ഭാരതം ചരിത്രം കുറിച്ച മെഡല്‍ ഉറപ്പാക്കി.

ലോകറാങ്കിങ്ങില്‍ 92-ാമതുള്ള അയ്ഹിക എട്ടാം റാങ്കുകാരിയായ ഷിന്‍ യുബിന്‍, 16-ാം സ്ഥാനത്തുള്ള ജിയോന്‍ ജിഹീ എന്നിവരെ തോല്‍പ്പിച്ചതാണ് ഭാരതത്തിന്റെ മെഡല്‍ നേട്ടത്തില്‍ നിര്‍ണായകമായത്.

ആദ്യ ഗെയിമില്‍ ഷിന്‍ യൂബെന്‍ അയ്ഹികയ്‌ക്ക് മുന്നില്‍ സ്‌കോര്‍ 119, 711, 12-10, 7-11, 11-7ന് അടിതെറ്റി വീണു. രണ്ടാം മത്സരത്തില്‍ മണിക ബത്ര ജിന്‍ ജിഹീയെ സ്‌കോര്‍ 12-14, 13-11, 11-5, 5-11, 12-10ന് കീഴടക്കിയതോടെ ഭാരതം മുന്നിലെത്തി. മൂന്നാം ഗെയിമില്‍ ഭാരത നിരയില്‍ ലോകറാങ്കിങ്ങില്‍ മുന്നിലുള്ള ഭാരതവനിതാ താരം(ലോകറാങ്കിങ്ങില്‍ 26) ശ്രീജ അക്യുലയ്‌ക്ക് പിഴച്ചു. താരത്തെ ലീ യൂന്‍ഹ്യെ നേരിട്ടുള്ള ഗെയിമിന് വീഴ്‌ത്തി(സ്‌കോര്‍ 6-11, 10-12, 8-11. തൊട്ടടുത്ത സെറ്റില്‍ മണികയെ യൂബിന്‍(സ്‌കോര്‍ 13-11, 11-4, 6-11, 7-11, 12-10) തോല്‍പ്പിച്ചതോടെ മത്സരം 2-2 സമനിലയിലായി. വിജയിയെ നിര്‍ണയിക്കുന്ന അഞ്ചാം ഗെയിമിനിറങ്ങിയ അയ്ഹിക ജിഹീയെ തോല്‍പ്പിച്ച് വെങ്കലം ഉറപ്പാക്കി. സ്‌കോര്‍ 7-11, 11-6, 12-10, 12-10നായിരുന്നു അയ്ഹികയുടെ നിര്‍ണായക വിജയം.

കസാഖ്സ്ഥാനില്‍ നടക്കുന്ന ടൂര്‍ണമെന്റിന്റെ സെമി വരെ മുന്നേറിയ വനിതാ ടീം ജപ്പാനോട് തോറ്റിരുന്നു. തുടര്‍ന്നാണ് വെങ്കലത്തിനായി പൊരുതിയത്.