കോലാപൂർ : അഭിനയത്തിന്റെ അടുത്ത ഘട്ടവുമായി കോൺഗ്രസ് നേതാവ് രാഹുൽ ഗാന്ധി . കടലിൽ ചാടാനും , ധ്യാനിക്കാനുമൊക്കെ പോയതിന് പിന്നാലെ ഇപ്പോൾ പാചകത്തിന്റെ വഴിയെയാണ് രാഹുൽ . മഹാരാഷ്ട്രയിലെ കോലാപൂരിൽ താമസിക്കുന്ന ദളിത് കുടുംബത്തിന്റെ വീട്ടിലെ അടുക്കളയിലാണ് രാഹുൽ കയറിപ്പറ്റിയത് . വീട്ടുകാർക്കൊപ്പം അടുക്കളയിൽ ഭക്ഷണം പാകം ചെയ്യുകയും ജാതി, വിവേചനം തുടങ്ങിയ നിരവധി വിഷയങ്ങൾ ചർച്ച ചെയ്യുകയും ചെയ്തു. ഗൃഹനാഥനായ അജയ് തുക്കാറാം സനദേയെയും ഭാര്യ അഞ്ജന തുക്കാറാം സനദേയെയും കണ്ടതും പച്ചക്കറികൾ അരിഞ്ഞ് നൽകിയതുമൊക്കെ രാഹുൽ സോഷ്യൽ മീഡിയയിൽ പങ്ക് വയ്ക്കുകയും ചെയ്തു.
‘ അവർ എന്താണ് കഴിക്കുന്നത്, അവർ അത് എങ്ങനെ പാചകം ചെയ്യുന്നു, അതിന്റെ സാമൂഹികവും രാഷ്ട്രീയവുമായ പ്രാധാന്യം എന്നിവയെ കുറിച്ചുള്ള ആകാംക്ഷ, ഞാൻ അജയ് തുക്കാറാം സനദെ ജിക്കും അഞ്ജന തുക്കാറാം സനദേ ജിക്കുമൊപ്പം സമയം ചെലവഴിച്ചു, മഹാരാഷ്ട്രയിലെ കോലാപൂരിലുള്ള അദ്ദേഹത്തിന്റെ വീട്ടിലേക്ക് അദ്ദേഹം എന്നെ ആദരപൂർവം ക്ഷണിക്കുകയും അടുക്കളയിൽ അദ്ദേഹത്തെ സഹായിക്കാൻ അവസരം നൽകുകയും ചെയ്തു. ഞങ്ങൾ ഒരുമിച്ച് ‘ഹർഭ്യാച്ചി ഭാജി’ തയ്യാറാക്കി.‘ എന്നാണ് രാഹുലിന്റെ ട്വീറ്റ്. അതേസമയം ഇതൊക്കെ എങ്ങനെ രാഹുലിന് സാധിക്കുന്നുവെന്നാണ് ചില കമന്റുകൾ .
