തിരുവനന്തപുരം: ഭാഗ്യാന്വേഷികളുടെ കാത്തിരിപ്പിന് ഇനി മണിക്കൂറുകള് മാത്രം. 25 കോടി ആര്ക്കാവും? നാളെ ഉച്ചയ്ക്ക് രണ്ടുമണിയോടെ ധനമന്ത്രി കെ.എന് ബാലഗോപാല് ആദ്യ നറുക്കെടുക്കും.
നറുക്കെടുപ്പിന് ഒരു ദിവസം മാത്രം ശേഷിക്കെ ടിക്കറ്റ് വില്പ്പന 70 ലക്ഷത്തിലേക്ക് കടന്നു. ആകെ 80 ലക്ഷം ടിക്കറ്റുകള് വിപണിയില് എത്തിച്ചതില്, തിങ്കളാഴ്ച നാലുമണി വരെയുള്ള കണക്ക് അനുസരിച്ച് 69,70,438 ടിക്കറ്റുകളാണ് വിറ്റു പോയത്.
മുഴുവന് ടിക്കറ്റുകളും വിറ്റുപോകുമെന്നാണ് ലോട്ടറി വകുപ്പ് പ്രതീക്ഷിക്കുന്നത്. ജില്ലാ അടിസ്ഥാനത്തില് ഇക്കുറിയും പാലക്കാട് ജില്ലയാണ് വില്പ്പനയില് മുന്നില് നില്ക്കുന്നത്. സബ് ഓഫീസുകളിലേതുള്പ്പെടെ 1278720 ടിക്കറ്റുകളാണ് ഇവിടെ ഇതിനോടകം വിറ്റഴിക്കപ്പെട്ടത്. 921350 ടിക്കറ്റുകള് വിറ്റഴിച്ച് തിരുവനന്തപുരവും 844390 ടിക്കറ്റ് വിപണിയിലെത്തിച്ച് തൃശൂരും ഒപ്പമുണ്ട്. മറ്റ് ജില്ലകളിലും അവശേഷിക്കുന്ന ടിക്കറ്റുകള് ഉടനടി വിറ്റു തീരും എന്ന നിലയിലേയ്ക്ക് വില്പ്പന പുരോഗമിക്കുന്നു.
