കൊച്ചി: എറണാകുളം സിവില്‍ സ്റ്റേഷനില്‍ ജോലി വാഗ്ദാനം ചെയ്ത് പൊതുജനങ്ങളില്‍ തട്ടിപ്പ് നടത്തുന്നതുമായി ബന്ധപ്പെട്ട് പൊതുജനങ്ങള്‍ ജാഗ്രത പാലിക്കണമെന്ന് ജില്ലാ കളക്ടര്‍ എന്‍.എസ്.കെ. ഉമേഷ്. വിവിധ സര്‍ക്കാര്‍ വകുപ്പുകളില്‍ സ്ഥിര/താത്കാലിക നിയമനം നല്‍കാമെന്ന് വാഗ്ദാനം ചെയ്ത് പണം വാങ്ങിയ വ്യക്തിയെ സെക്യൂരിറ്റി ജീവനക്കാരും ജീവനക്കാരും ചേര്‍ന്ന് പിടികൂടി തൃക്കാക്കര പോലീസിന് കൈമാറിയിട്ടുണ്ട്. വിരമിച്ച സൈനിക ഉദ്യോഗസ്ഥനാണെന്ന് അവകാശപ്പെട്ട് വ്യാജ തിരിച്ചറിയല്‍ കാര്‍ഡുമായാണ് ഇയാള്‍ തട്ടിപ്പ് നടത്തിയിരുന്നത്. പി എസ് സി, എംപ്ലോയ്‌മെന്റ് എക്‌സ്‌ചേഞ്ച്, ബന്ധപ്പെട്ട സര്‍ക്കാര്‍ വകുപ്പുകള്‍ തുടങ്ങിയവ മുഖേന നടത്തുന്ന പരീക്ഷകള്‍ക്കും അഭിമുഖത്തിനും മറ്റ് നടപടിക്രമങ്ങള്‍ക്കും ശേഷമാണ് സര്‍ക്കാര്‍ വകുപ്പുകളില്‍ ജോലി നേടാന്‍ കഴിയുക. പണം നല്‍കി ജോലി ലഭിക്കുമെന്ന ചതിക്കുഴികളില്‍ പൊതുജനങ്ങള്‍ വീഴരുതെന്നും ഇക്കാര്യത്തില്‍ ജാഗ്രത പാലിക്കണമെന്നും ജില്ലാ കളക്ടര്‍ മുന്നറിയിപ്പ് നല്‍കി.
