കാഞ്ഞങ്ങാട്: റെയില്‍വേ സ്റ്റേഷന് സമീപം മൂന്ന് സ്ത്രീകള്‍ ട്രെയിന്‍ തട്ടി മരിച്ചു. കോട്ടയം ചിങ്ങവനത്ത് നിന്ന് രാജപുരം കള്ളാറിലെ ബന്ധുവീട്ടില്‍ വിവാഹ ചടങ്ങില്‍ പങ്കെടുക്കാനെത്തിയവരാണ് അപകടത്തില്‍പ്പെട്ടത്.
ചിങ്ങവനം പാലക്കുടിയില്‍ ചിന്നമ്മ അബ്രഹാം (69), റോബര്‍ട്ട് കുര്യക്കോസിന്റെ ഭാര്യയും നഴ്സുമായ എയ്ഞ്ചല (30), പരിപ്പുത്തറയിലെ ആലീസ് തോമസ് (60) എന്നിവരാണ് മരിച്ചത്. ഇന്നലെ സന്ധ്യക്ക് 7.30നായിരുന്നു അപകടം. കല്യാണത്തിന് വന്ന വധുവിന്റെ വീട്ടുകാര്‍ ഇന്നലെ രാവിലെയാണ് കാഞ്ഞങ്ങാട് റെയില്‍വേ സ്റ്റേഷനില്‍ ഇറങ്ങിയത്. അവിടെ നിന്ന് ട്രാവലറിലാണ് രാജപുരത്തേക്ക് പോയത്. കല്യാണം കഴിഞ്ഞ് തിരിച്ച് മലബാര്‍ എക്‌സ്പ്രസില്‍ പോകാനായി റെയില്‍വേ സ്റ്റേഷനിലേക്ക് വന്നതായിരുന്നു ഇവര്‍.
ട്രെയിന്‍ വരുന്നതിന്റെ പ്ലാറ്റ്ഫോം അറിയാത്തതിനാല്‍ പാളം മുറിച്ചുകടക്കുന്നതിനിടെ മംഗ്ളുരു ഭാഗത്തേക്ക് പോവുകയായിരുന്ന കോയമ്പത്തൂര്‍-ഹിസാര്‍ എക്‌സ്പ്രസ് ട്രെയിന്‍ ഇടിച്ചാണ് അപകടം സംഭവിച്ചത്.മൂന്നൂറ് മീറ്ററോളം വലിച്ചിഴച്ച് കൊണ്ടുപോയിരുന്നു, മൂന്ന് പേരുടേയും ശരീരം ചിന്നഭിന്നമായി. പോലീസ് സംഘം സ്ഥലത്തെത്തി ഇന്‍ക്വസ്റ്റ് നടപടികള്‍ പൂര്‍ത്തിയാക്കി
പ്രതികരിക്കാൻ ഇവിടെ എഴുതുക: