തൃശൂര്: ചരിത്രത്തിലെ ഏറ്റവും വലിയ കല്യാണ മേളം നടന്ന മാസം വരുമാനത്തിന്റെ കാര്യത്തിലും അക്ഷരാര്ത്ഥത്തില് ഗുരുവായൂര് ക്ഷേത്രം മുന്നില്. ഈ മാസം ഇതുവരെയുള്ള ഭണ്ഡാര വരവ് 5.80 കോടി രൂപ കടന്നു. ഗുരുവായൂര് ക്ഷേത്രത്തില് 2024 സെപ്റ്റംബര് മാസത്തെ ഭണ്ഡാരം എണ്ണല് ഇന്ന് പൂര്ത്തിയായപ്പോള് 58081109 രൂപയാണ് ഇതുവരെ ലഭിച്ചിരിക്കുന്നത്. ഇതിനൊപ്പം 2 കിലോ 626 ഗ്രാം 500 മില്ലിഗ്രാം സ്വര്ണ്ണവും ലഭിച്ചു. 17കിലോ 700ഗ്രാം വെള്ളിയും ലഭിച്ചിട്ടുണ്ട്.
കേന്ദ്ര സര്ക്കാര് പിന്വലിച്ച രണ്ടായിരം രൂപയുടെ 29 ഉം നിരോധിച്ച ആയിരം രൂപയുടെ 13 ഉം അഞ്ഞൂറിന്റെ 114 കറന്സിയും ലഭിച്ചു. എസ് ഐ ബി ഗുരുവായൂര് ശാഖയ്ക്കായിരുന്നു എണ്ണല് ചുമതല. കിഴക്കേ നട ഇ ഭണ്ഡാരം വഴി 5.39 ലക്ഷം രൂപയും പടിഞ്ഞാറെ നടയിലെ ഇ ഭണ്ഡാരം വഴി 34146 രൂപയും ലഭിച്ചതായി അധികൃതര് അറിയിച്ചു.
