കൊല്ലം: ഓയൂരില് ആറു വയസുകാരിയെ തട്ടിക്കൊണ്ടുപോയ കേസില് തുടരന്വേഷണത്തിന് ഉത്തരവ്. കൊല്ലം അഡീഷണല് സെഷന്സ് കോടതിയുടേതാണ് ഉത്തരവ്. കൂടാതെ രണ്ടാംപ്രതി അനിതകുമാരിക്ക് കോടതി ജാമ്യം അനുവദിച്ചു.
മൂന്നാം പ്രതി അനുപമയ്ക്ക് ഹൈക്കോടതി നേരത്തെ ജാമ്യം അനുവദിച്ചിരുന്നു. അന്വേഷണം തൃപ്തികരമല്ലെന്ന കുട്ടിയുടെ പിതാവിന്റെ ആരോപണത്തെ തുടര്ന്നാണ് അന്വേഷണത്തിന് റൂറല് ക്രൈംബ്രാഞ്ച് ഡി വൈ എസ് പി, എം എം ജോസിനെ നിയോഗിച്ചത്. കുട്ടിയുടെ മൊഴിയുടെ അടിസ്ഥാനത്തില് തുടര് അന്വേഷണം നടത്തുമെന്നാണ് അന്വേഷണ സംഘം അറിയിച്ചത്.
കുട്ടിയുടെ പിതാവിന്റെയും ആവശ്യമെങ്കില് സഹോദരന്റെയും രഹസ്യമൊഴിയും രേഖപ്പെടുത്തും. കുട്ടിയെ തട്ടിക്കൊണ്ടു പോകുമ്പോള് ഒപ്പമുണ്ടായിരുന്ന സഹോദരന് കാറില് നാലു പേരെ കണ്ടിരുന്നു. എന്നാല് അന്വേഷണം മൂന്നു പേരില് ഒതുങ്ങി. ഇതാണ് തുടരന്വേഷണത്തിന് വഴിയൊരുക്കിയത്.
കാറിലെത്തിയ സംഘം കുട്ടിയെ തട്ടിക്കൊണ്ടുപോകുകയും ഒരു ദിവസത്തിന് ശേഷം കുഞ്ഞിനെ കൊല്ലം ആശ്രാമം മൈതാനത്ത് ഉപേക്ഷിക്കുകയുമായിരുന്നു. പൊലീസിന്റെ പഴുതടച്ച അന്വേഷണത്തിനൊടുവിലാണ് പ്രതികള് പിടിയിലാകുന്നത്. സാമ്പത്തിക ബാധ്യത മറികടക്കാന് വേണ്ടിയാണ് പ്രതികള് കുറ്റകൃത്യം നടത്തിയത്. പത്മകുമാര്, ഭാര്യ അനിതകുമാരി, മകള് അനുപമ എന്നിവരാണ് കേസിലെ പ്രധാന പ്രതികള്.
ഒരു വര്ഷം നീണ്ട ആസൂത്രണത്തിനും ഒന്നരമാസത്തെ അന്വേഷണത്തിനുമൊടുവിലാണ് ഇവര് ഓയൂരില് നിന്നും കുഞ്ഞിനെ തട്ടിക്കൊണ്ടുപോയത്. അമ്മ അനിതകുമാരിക്കൊപ്പം അട്ടക്കുളങ്ങര വനിത ജയിലില് കഴിയുകയായിരുന്നു അനുപമ. അച്ഛന് പത്മകുമാര് പൂജപ്പുര സെന്ട്രല് ജയിലിലാണ്. ഇയാളുടെ ജാമ്യാപേക്ഷ തള്ളി.
