കൊല്ലം: കുമ്മിളില് പെണ്സുഹൃത്തുമായി ചേര്ന്ന് ഭാര്യയെ കൊലപ്പെടുത്താന് ശ്രമിച്ച യുവാവ് അറസ്റ്റില്. ചിതറ സ്വദേശി സതീഷാണ് കടയ്ക്കല് പൊലീസിന്റെ പിടിയിലായത്. സതീഷിന്റെ ഭാര്യ സായൂജ്യയെ രണ്ടാം പ്രതി സുജിതയുടെ വീട്ടിലേക്ക് വിളിച്ചുവരുത്തി കൊലപ്പെടുത്താന് ശ്രമിച്ചതിനാണ് കേസ്.
2024 ജനുവരിയിലാണ് കേസിനാധാരമായ സംഭവം. സതീഷും സുജിതയും ഏറെ നാളായി അടുപ്പത്തിലാണ്. ഈ സാഹചര്യത്തില് സതീഷിന്റെ ഭാര്യ സായൂജ്യയെ അപായപ്പെടുത്തണമെന്ന ലക്ഷ്യത്തില് സജിത തന്റെ കുമ്മിളിലെ വീട്ടിലേക്ക് വിളിച്ചുവരുത്തി. വീട്ടില് വച്ച് സായൂജ്യയെ സതീഷും സുജിതയും ചേര്ന്ന് ക്രൂരമായി ആക്രമിച്ചു. നിലത്തിട്ട് ചവിട്ടുകയും കത്തി ഉപയോഗിച്ച് കുത്തി മാരകമായി പരിക്കേല്പ്പിക്കുകയും ചെയ്തു.
സംഭവ ശേഷം പ്രതികള് ഒളിവില് പോയെങ്കിലും രണ്ടാം പ്രതി സുജിതയെ നേരത്തേ പൊലീസ് അറസ്റ്റ് ചെയ്തു.പ്രതിയെ റിമാന്ഡ് ചെയ്തെങ്കിലും ജാമ്യത്തിലാണ്.
ഒളിവില് കഴിഞ്ഞിരുന്ന സതീഷിനെ കടയ്ക്കല് പൊലീസ് ചൊവ്വാഴ്ച അറസ്റ്റ് ചെയ്യുകയായിരുന്നു. ജാമ്യാപേക്ഷ കോടതി തള്ളിയതിനെ തുടര്ന്ന് കീഴടങ്ങുകയായിരുന്നു പ്രതി. വിവിധ സ്റ്റേഷനുകളിലായി നിരവധി ക്രിമിനല് കേസുകളില് പ്രതിയാണ് സതീഷ്.
