തിരുവനന്തപുരം: തൃശൂരിലെ വിജയം പൂരം കലക്കി നേടിയതല്ലെന്ന് ബിജെപി സംസ്ഥാന അധ്യക്ഷൻ കെ.സുരേന്ദ്രൻ. മത ന്യൂനപക്ഷങ്ങൾ ഉൾപ്പടെ എല്ലാവിഭാഗം ആളുകളിൽ നിന്നുമുള്ള വോട്ടുകൾ സുരേഷ് ഗോപിക്ക് നേടാനായെന്നും കെ.സുരേന്ദ്രൻ പറഞ്ഞു. തൃശൂര് പൂരം കലക്കുക എന്നത് ബിജെപിയുടേയും സിപിഎമ്മിന്റേയും പ്ലാനായിരുന്നുവെന്ന് പ്രതിപക്ഷ നേതാവ് വി ഡി സതീശൻ ആരോപിച്ചിരുന്നു. ഇതിന് മറുപടി പറയുകയായിരുന്നു സുരേന്ദ്രൻ.
സുരേഷ് ഗോപിക്ക് മതന്യൂനപക്ഷങ്ങളുടെ വോട്ട് ലഭിച്ചിട്ടുണ്ട്. പൂരം കലക്കിയാൽ എങ്ങനെ മതന്യൂനപക്ഷങ്ങളുടെ വോട്ട് കിട്ടുമെന്ന് സുരേന്ദ്രൻ ചോദിച്ചു. അന്തർധാരയുള്ളത് യുഡിഎഫും എൽഡിഎഫും തമ്മിലാണ്. വിഡി സതീശൻ പിണറായി വിജയന്റെ ഏജന്റാണെന്നും കെ സുരേന്ദ്രൻ പറഞ്ഞു. എഡിജിപി എം ആർ അജിത് കുമാർ രാഹുൽ ഗാന്ധിയുമായും സതീശനുമായും കുഞ്ഞാലിക്കുട്ടിയുമായും കൂടിക്കാഴ്ച നടത്തിയിട്ടുണ്ട്. പുനർജനി തട്ടിപ്പിൽ വി ഡി സതീശനെതിരെ അന്വേഷണം ഇല്ലാത്തത് എന്തുകൊണ്ടെന്നും സുരേന്ദ്രൻ ചോദിച്ചു.
വിശ്വാസം, ഹിന്ദു, ആചാരം എന്നൊക്കെ പറയുന്നവര് ഇന്ന് ഉത്സവം കലക്കാന് കൂട്ടുനില്ക്കുകയാണെന്നും തൃശൂര് പൂരം കലക്കാന് കൂട്ടുനിന്ന ബിജെപി ഹിന്ദുക്കളെ കബളിപ്പിക്കുകയാണ്. അവരാണ് ഇപ്പോള് വിശ്വാസത്തെക്കുറിച്ചും ആചാരത്തെക്കുറിച്ചും തങ്ങള്ക്ക് ക്ലാസ് എടുക്കുന്നത്. അവരുടെ തനിനിറം പുറത്തായെന്നും വി.ഡി സതീശന് പറഞ്ഞിരുന്നു.
