സർക്കാർ ജീവനക്കാർക്ക് ആർഎസ്എസ് പ്രവർത്തനങ്ങളിൽ പങ്കെടുക്കാൻ അനുമതി ; സുപ്രധാന തീരുമാനവുമായി ഉത്തരാഖണ്ഡ്

ഡെറാഡൂൺ: രാഷ്‌ട്രീയ സ്വയംസേവക് സംഘിന്റെ രാവിലെയും വൈകുന്നേരവും ഉള്ള യോഗങ്ങളിലും മറ്റ് സാംസ്കാരിക സാമൂഹിക പ്രവർത്തനങ്ങളിലും സംസ്ഥാന ജീവനക്കാർ പങ്കെടുക്കുന്നത് സംസ്ഥാന ജീവനക്കാരുടെ പെരുമാറ്റച്ചട്ടം 2002 ന്റെ ലംഘനമായി കണക്കാക്കില്ലെന്ന് ഉത്തരാഖണ്ഡ് സർക്കാർ. ഇതുമായി ബന്ധപ്പെട്ട്, സംസ്ഥാന ജീവനക്കാർക്ക് ആർഎസ്എസ് പരിപാടികളിൽ പങ്കെടുക്കാമെന്ന് അഡീഷണൽ ചീഫ് സെക്രട്ടറി ആനന്ദ് വർധൻ ഉത്തരവിറക്കി.

കൂടാതെ ഈ ജോലി അവരുടെ ഔദ്യോഗിക ചുമതലകൾക്കും ഉത്തരവാദിത്തങ്ങൾക്കും തടസ്സം സൃഷ്ടിക്കുന്നില്ലെന്നും അദ്ദേഹം വ്യക്തമാക്കി. സെപ്തംബർ 5 ന് അയച്ച കത്തിലാണ് അഡീഷണൽ ചീഫ് സെക്രട്ടറി ആനന്ദ് വർധനാണ് ഇക്കാര്യം പറഞ്ഞത്.

സർക്കാരിന്റെ കൃത്യമായ ആലോചനയ്‌ക്ക് ശേഷം ആർഎസ്എസ് ശാഖയിലും (രാവിലെ/വൈകിട്ട് മീറ്റിംഗിലും) മറ്റ് സാംസ്കാരിക സാമൂഹ്യ കാര്യത്തിലും ഏതെങ്കിലും സർക്കാർ ജീവനക്കാരനെ പങ്കെടുപ്പിക്കാൻ തീരുമാനിച്ചു. പ്രവർത്തനങ്ങൾ ഉത്തരാഖണ്ഡ് സ്റ്റേറ്റ് എംപ്ലോയീസ് പെരുമാറ്റ ചട്ടങ്ങൾ, 2002 (കാലാകാലങ്ങളിൽ ഭേദഗതി ചെയ്യുന്നതുപോലെ) ലംഘനമായി കണക്കാക്കില്ലെന്നും വ്യക്തമാക്കി.

ഇതിനു പുറമെ സർക്കാർ ഓഫീസ് സമയത്തിന് മുമ്പും ശേഷവും മാത്രമേ അത്തരം പങ്കാളിത്തമോ സംഭാവനയോ ചെയ്യാൻ കഴിയൂ എന്നും അഡീഷണൽ ചീഫ് സെക്രട്ടറി വ്യക്തമാക്കി. കൂടാത ഇക്കാര്യത്തിൽ നേരത്തെ പുറപ്പെടുവിച്ച എല്ലാ സർക്കാർ ഉത്തരവുകളും അസാധുവാക്കപ്പെട്ടതായി കണക്കാക്കുമെന്നും അദ്ദേഹം വ്യക്തമാക്കി.

നേരത്തെ രാഷ്‌ട്രീയ സ്വയംസേവക സംഘത്തിന്റെ പ്രവർത്തനങ്ങളിൽ പങ്കെടുക്കാൻ സർക്കാർ ഉദ്യോഗസ്ഥർക്ക് അനുമതി നൽകി പേഴ്സണൽ മന്ത്രാലയം നേരത്തെ പുറപ്പെടുവിച്ച ഉത്തരവ് പ്രതിപക്ഷവും ബിജെപിയും തമ്മിലുള്ള വാക്പോരിൽ കലാശിച്ചിരുന്നു. സർക്കാർ ജീവനക്കാർ ആർഎസ്എസ് പ്രവർത്തനങ്ങളിൽ ഏർപ്പെടുന്നത് വിലക്കിക്കൊണ്ട് 58 വർഷം മുമ്പ് പുറപ്പെടുവിച്ച ഭരണഘടനാ വിരുദ്ധ ഉത്തരവ് കേന്ദ്രസർക്കാർ പിൻവലിച്ചതായി ബിജെപി നേതാവ് അമിത് മാളവ്യ പറഞ്ഞു.

58 വർഷം മുമ്പ് 1966-ൽ രാഷ്‌ട്രീയ സ്വയംസേവക സംഘത്തിന്റെ പ്രവർത്തനങ്ങളിൽ സർക്കാർ ജീവനക്കാർക്ക് വിലക്ക് ഏർപ്പെടുത്തിക്കൊണ്ട് പുറപ്പെടുവിച്ച ഭരണഘടനാ വിരുദ്ധ ഉത്തരവ് മോദി സർക്കാർ പിൻവലിച്ചതിനെ ഉദ്ധരിച്ച് മാളവ്യ തിങ്കളാഴ്ച എക്‌സിൽ പറഞ്ഞിരുന്നു.

1966 നവംബർ 7 ന് പാർലമെൻ്റിൽ ഗോഹത്യക്കെതിരെ വൻ പ്രതിഷേധം നടന്നതിനാലാണ് നിരോധനം ഏർപ്പെടുത്തിയത്. ആർഎസ്എസ്-ജനസംഘം ലക്ഷക്കണക്കിന് ജനങ്ങളുടെ പിന്തുണ സമാഹരിച്ചു. പോലീസ് വെടിവെപ്പിൽ പലരും മരിച്ചു. തുടർന്ന് ഇന്ദിരാഗാന്ധി സർക്കാർ ജീവനക്കാരെ ആർഎസ്എസിൽ ചേരുന്നതിൽ നിന്ന് വിലക്കി ഉത്തരവിറക്കുകയായിരുന്നു.