ട്രിച്ചി: ട്രിച്ചിയിലെ സർക്കാർ എയ്ഡഡ് സ്‌കൂളുമായി ബന്ധപ്പെട്ട ഹോസ്റ്റലിൽ പ്രായപൂർത്തിയാകാത്ത പെൺകുട്ടികളെ ലൈംഗികമായി പീഡിപ്പിച്ച കേസിൽ 31 കാരനായ ഡോക്ടർ അറസ്റ്റിൽ. കുട്ടികൾക്കെതിരായ ലൈംഗികാതിക്രമങ്ങൾ (പോക്‌സോ) നിയമത്തിലെ വകുപ്പുകൾ പ്രകാരം കേസെടുത്ത പ്രതിയെ അറസ്റ്റ് ചെയ്തു.
കുറ്റകൃത്യങ്ങൾ മറച്ചുവെക്കാൻ സഹായിച്ചെന്നാരോപിച്ച് പ്രതിയുടെ അമ്മയായ സ്കൂൾ ഹെഡ്മിസ്ട്രസിനെയും കസ്റ്റഡിയിലെടുത്തത് ശ്രദ്ധേയമാണ്. ഇവരെ 3 ദിവസത്തെ ജുഡീഷ്യൽ കസ്റ്റഡിയിൽ വിട്ടു.
പീഡനത്തിനിരയായ പെൺകുട്ടി ഹെൽപ്പ് ലൈൻ നമ്പറിൽ വിളിച്ചറിയിച്ചതിനെ തുടർന്നാണ് സംഭവം പുറത്തറിയുന്നത്. തുടർന്ന് ജില്ലാ ചൈൽഡ് പ്രൊട്ടക്ഷൻ ഓഫീസറും മറ്റ് ഉദ്യോഗസ്ഥരും ചേർന്ന് വിദ്യാർത്ഥികളുമായി നടത്തിയ അഭിമുഖത്തിലാണ് പ്രതി മാസങ്ങളായി വിദ്യാർത്ഥിനികളെ ആക്രമിച്ചതായി വ്യക്തമായത്.
നേരത്തെ മഹാരാഷ്‌ട്രയിലെ ബദ്‌ലാപൂരിലെ സ്‌കൂളിനുള്ളിൽ സമാനമായ സംഭവത്തിൽ നാല് വയസ്സുള്ള രണ്ട് കുട്ടികളെ സ്കൂൾ ജീവനക്കാർ ലൈംഗികമായി പീഡിപ്പിച്ചിരുന്നു. തുടർന്ന് ലൈംഗികാതിക്രമം ആരോപിക്കപ്പെട്ട കേസ് സംസ്ഥാനത്തുടനീളം വ്യാപകമായ രോഷത്തിന് കാരണമാവുകയും രാജ്യവ്യാപകമായി നിരവധി പ്രതിഷേധങ്ങൾക്ക് കാരണമാവുകയും ചെയ്തു.
