കൊച്ചി: ലൈംഗികമായി പീഡിപ്പിച്ചെന്ന നടിയുടെ പരാതിയില് നടനും എംഎല്എയുമായ എം മുകേഷിന് താത്കാലിക ആശ്വാസം.അടുത്ത മാസം മൂന്ന് വരെ എറണാകുളം ജില്ലാ സെഷന്സ് കോടതി അറസ്റ്റ് തടഞ്ഞു.
മുകേഷിന്റെ മുന്കൂര് ജാമ്യാപേക്ഷ ഫയലില് സ്വീകരിച്ചാണ് ജില്ലാ സെഷന്സ് കോടതിയുടെ ഇടപെടല്. മുന്കൂര് ജാമ്യാപേക്ഷയില് വിശദമായ വാദം അടുത്ത മാസം മൂന്നിന് നടക്കും.
ഐപിസി 376(1) ബലാത്സംഗം,ഐപിസി 354 സ്ത്രീത്വത്തെ അപമാനിക്കണമെന്ന ഉദ്ദേശത്തോടെയുള്ള ബലപ്രയോഗം,ഐപിസി 452 അതിക്രമിച്ച് കടക്കല്,ഐപിസി 509 സ്ത്രീത്വത്തെ അപമാനിക്കുന്ന അംഗവിക്ഷേപം, വാക്കുകള് ബലാത്സംഗം, സ്ത്രീത്വത്തെ അപമാനിക്കല് , അതിക്രമിച്ച് കടക്കല് എന്നീ കുറ്റങ്ങള്ക്കാണ് മുകേഷിനെതിരെ കേസ്.
എന്നാല് ഗുരുതര വകുപ്പുകള് ചുമത്തി കേസെടുത്തിട്ടും മുകേഷ് എംഎല്എ സ്ഥാനം രാജി വക്കേണ്ടതില്ലെന്നാണ് സിപിഎം നിലപാട്. സിനിമാ നയരൂപീകരണ സമിതി പുനസംഘടിപ്പിക്കുമെന്നും അപ്പോള് മുകേഷിനെ സമിതിയില് നിന്ന് ഒഴിവാക്കാനുമാണ് സെക്രട്ടേറിയറ്റിലുണ്ടാക്കിയ ധാരണ.
