തിരുവനന്തപുരം: കേരള ക്രിക്കറ്റ് അസോസിയേഷന്‍ സംഘടിപ്പിക്കുന്ന പ്രഥമ പ്രഫഷനല്‍ ക്രിക്കറ്റ് ലീഗായ കെസിഎലിന്റെ മത്സരക്രമം പ്രഖ്യാപിച്ചു.
സപ്തംബര്‍ മൂന്നിന് ഉച്ചകഴിഞ്ഞ് 2.30ന് ആലപ്പി റിപ്പിള്‍സും തൃശൂര്‍ ടൈറ്റന്‍സും തമ്മിലാണ് ആദ്യ മത്സരം. വൈകിട്ട് 6.45ന് നടക്കുന്ന ഉദ്ഘാടനച്ചടങ്ങിനു ശേഷം 7.45ന് ട്രിവാന്‍ഡ്രം റോയല്‍സും കൊച്ചി ബ്ലൂ ടൈഗേഴ്സും തമ്മിലാണ് രണ്ടാം മത്സരം. ട്വന്റി20 ലീഗിലെ മറ്റു ദിവസങ്ങളിലെ രണ്ടാമത്തെ മത്സരം വൈകിട്ട് 6.45 മുതലാണ്.
തിരുവനന്തപുരം സ്പോര്‍ട്സ് ഹബ് സ്റ്റേഡിയത്തില്‍ നടക്കുന്ന ലീഗിന്റെ ആദ്യ റൗണ്ടില്‍ 6 ടീമുകളും 2 തവണ വീതം പരസ്പരം മത്സരിക്കും. ആദ്യ റൗണ്ടിലെ പോയിന്റ് നിലയില്‍ ഒന്നും നാലും സ്ഥാനക്കാരും രണ്ടും മൂന്നും സ്ഥാനക്കാരും തമ്മിലുള്ള സെമി ഫൈനല്‍ 17ന് നടക്കും. 18ന് 6.45നാണ് ഫൈനല്‍. ആകെ 33 മത്സരങ്ങളാണുള്ളത്. കാണികള്‍ക്കു പ്രവേശനം സൗജന്യമാണ്. മത്സരങ്ങളെല്ലാം സ്റ്റാര്‍ സ്പോര്‍ട്സ് 1 ചാനലിലും ഒടിടി പ്ലാറ്റ്ഫോമായ ഫാന്‍കോഡിലും തത്സമയം സംപ്രേക്ഷണം ചെയ്യും.
31ന് ആണ് ലീഗ് ലോഞ്ചിങ് ചടങ്ങ്. ടീമിലെ താരങ്ങള്‍ക്കൊപ്പം ലീഗ് അംബാസഡറായ നടന്‍ മോഹന്‍ലാലും പങ്കെടുക്കും.
