തിരുവനന്തപുരം : മലയാള ചലച്ചിത്ര രംഗത്തെ സ്ത്രീകള്‍ നേരിടുന്ന പ്രശ്നങ്ങള്‍ പഠിച്ച് തയാറാക്കിയ ജസ്റ്റിസ് ഹേമ കമ്മിറ്റി റിപ്പോര്‍ട്ട് പുറത്തുവിടാത്തതില്‍ സാംസ്‌കാരിക വകുപ്പിനോട് വിവരാവകാശ കമ്മിഷണര്‍ എ എ ഹക്കിം വിശദീകരണം തേടി . റിപ്പോര്‍ട്ട് ആവശ്യപ്പെട്ട മാധ്യമപ്രവര്‍ത്തകര്‍ക്ക് അത് നല്‍കുമെന്ന് ആദ്യം പറഞ്ഞെങ്കിലും പിന്നീട് നിയമ സെക്രട്ടറിയോട് കൂടിയാലോചിച്ച ശേഷം റിപ്പോര്‍ട്ട് പുറത്തുവിടാമെന്ന നിലപാടിലെത്തുകയായിരുന്നു സര്‍ക്കാര്‍ .
റിപ്പോര്‍ട്ട് പുറത്തുവിടുന്നതിനെതിരെ നടി രഞ്ജിനി കഴിഞ്ഞ ദിവസം ഹൈക്കോടതിയെ സമീപിച്ചിരുന്നു. അപ്പീലില്‍ ഇടക്കാല ഉത്തരവൊന്നും വന്നിട്ടില്ല.
ഹേമ കമ്മിറ്റി റിപ്പോര്‍ട്ട് പുറത്തുവിടുന്നതില്‍ തടസമില്ലെന്ന് സര്‍ക്കാരിന് നേരത്തേ നിയമോപദേശം ലഭിച്ചിട്ടുണ്ട്.എന്നാല്‍ നടി രഞ്ജിനി അപ്പീലുമായി കോടതിയെ സമീപിച്ച പശ്ചാത്തലത്തിലാണ് നിയമസെക്രട്ടറിയുമായി കൂടിക്കാഴ്ച നടത്തിയിട്ടേ റിപ്പോര്‍ട്ട് പുറത്തിവിടുന്നുള്ളൂ എന്ന് സര്‍ക്കാര്‍ നിലപാടെടുത്തത്.
2017 ഫെബ്രുവരി 17ന് നടി ആക്രമിക്കപ്പെട്ടതാണ് ഹേമ കമ്മിറ്റി രൂപീകരണത്തിന് കാരണമായത്. രണ്ടുവര്‍ഷത്തിനുശേഷം 2019 ഡിസംബര്‍ 31നാണ് കമ്മിറ്റി മുഖ്യമന്ത്രിക്ക് റിപ്പോര്‍ട്ട് നല്‍കിയത്. പിന്നീട് റിപ്പോര്‍ട്ട് പുറത്തുവിടണമെന്ന ആവശ്യം ശക്തമായി. സര്‍ക്കാരിന്റെ ഭാഗത്തുനിന്ന് അനുകൂല നിലപാട് ഉണ്ടാകാത്തതിനെ തുടര്‍ന്ന് വിഷയം കോടതി കയറിസ്വകാര്യതയെ ഹനിക്കുന്ന വിവരങ്ങള്‍ ഉള്ളതിനാല്‍ റിപ്പോര്‍ട്ട് പുറത്തുവിടാന്‍ ആകില്ലെന്ന സര്‍ക്കാര്‍ നിലപാടില്‍ ഉറച്ചുനിന്നു. ഒടുവില്‍ വിവരാവകാശ കമ്മീഷണര്‍ എ. അബ്ദുല്‍ ഹക്കീം റിപ്പോര്‍ട്ട് പുറത്തുവിടാന്‍ ഉത്തരവിട്ടു.
ഇതിനെതിരെ നിര്‍മ്മാതാവ് സജിമോന്‍ പാറയില്‍ കോടതിയെ സമീപിച്ചെങ്കിലും ഹൈക്കോടതി തളളി. സ്വകാര്യതയെ ഹനിക്കാതെയുളള വിവരങ്ങള്‍ പുറത്തുവിടാന്‍ ഹൈക്കോടതി അനുമതി നല്‍കി. ശനിയാഴ്ച റിപ്പോര്‍ട്ട് പുറത്തുവിടാനിരിക്കെയാണ് ഇന്നലെ നടി രഞ്ജിനി അപ്പീലുമായി ഹൈക്കോടതിയിലെത്തിയത്.
