തൃശൂര്: ബഡ്സ് ആക്ട് 2019 നിയമത്തിലെ വ്യവസ്ഥകള്ക്ക് വിരുദ്ധമായി വഞ്ചനാകുറ്റം ചെയ്തതിന്റെ അടിസ്ഥാനത്തില് തൃശൂര് ചെട്ടിയങ്ങാടി ധനവ്യവസായ എന്ന സ്ഥാപനത്തിനെതിരേ നടപടിയെടുത്തു. പൊതുജനങ്ങള്ക്ക് അമിത പലിശ വാഗ്ദാനം ചെയ്ത് നിക്ഷേപം സ്വീകരിക്കുകയും പണം തിരികെ നല്കാത്തതും ബോധ്യമായതിന്റെ അടിസ്ഥാനത്തിലാണ് സ്ഥാപനത്തിന്റെയും സ്ഥാപന ഉടമകളുടെയും പേരിലുള്ള സ്വത്തുക്കള് താല്ക്കാലികമായി ജപ്തി ചെയ്യുന്നതിനും ജപ്തി സ്ഥിരമാക്കുന്നതിനും കോടതിയില് ഹര്ജി ഫയല് ചെയ്യാന് ജില്ലാ മജിസ്ട്രേറ്റ് ഉത്തരവിട്ടത്.
സ്ഥാപനത്തിന്റെയും സ്ഥാപന ഉടമകളുടെയും മറ്റു പ്രതികളുടെയും തൃശൂര് ജില്ലയിലെ എല്ലാ സ്ഥാവര ജംഗമ വസ്തുക്കളും തിട്ടപ്പെടുത്തി കണ്ടുകെട്ടുന്നതിനായി സ്ഥാവര സ്വത്തുകളുടെ മഹസ്സര്, ലൊക്കേഷന് സ്കെച്ച്, തണ്ടപ്പേര് പകര്പ്പ് എന്നിവയുള്പ്പെടെ റിപ്പോര്ട്ട് തഹസില്ദാര്മാര് തയ്യാറാക്കും. ജില്ലാ രജിസ്ട്രാര് പ്രതികളുടെ സ്ഥാവര സ്വത്തുകളുടെ തുടര്ന്നുള്ള വില്പന നടപടികള് താല്ക്കാലികമായി മരവിപ്പിക്കുന്നതിനാവശ്യമായ നിര്ദ്ദേശങ്ങള് ബന്ധപ്പെട്ട എല്ലാ സബ് രജിസ്ട്രാര് ഓഫീസര്മാര്ക്കും അടിയന്തരമായി നല്കും.
പ്രതികളുടെ പേരില് ജില്ലയില് രജിസ്റ്റര് ചെയ്ത എല്ലാ മോട്ടോര് വാഹനങ്ങളുടെയും പട്ടിക തൃശൂര് റീജിയണല് ട്രാന്സ്പോര്ട്ട് ഓഫീസര് തയ്യാറാക്കി കളക്ട്രേറ്റിലേക്കും ജില്ലാ പോലീസ് മേധാവിക്കും കൈമാറും. പ്രതികളുടെ പേരില് ജില്ലയിലെ ബാങ്കുകള്, ട്രഷറികള്, സഹകരണ സ്ഥാപനങ്ങള് എന്നിവിടങ്ങളില് ആരംഭിച്ച എല്ലാത്തരം അക്കൗണ്ടുകളും ഫിക്സഡ് ഡെപ്പോസിറ്റുകളും മരവിപ്പിക്കുന്നതിനാവശ്യമായ നടപടികള് എല്ലാ സ്ഥാപന മേധാവിമാരും അടിയന്തരമായി സ്വീകരിക്കണം. ജില്ലയിലെ എല്ലാ ബാങ്ക് മാനേജര്മാര്ക്കും ഇത് സംബന്ധിച്ചുള്ള അറിയിപ്പ് നല്കാന് തൃശൂര് ലീഡ് ബാങ്ക് മാനേജറെ ചുമതലപ്പെടുത്തി.
