ന്യൂദല്‍ഹി: ഓസ്‌ട്രേലിയയിലേക്ക് ഭാരത ക്രിക്കറ്റ് ടീം ഈ വര്‍ഷം അവസാനം നടത്തുന്ന പര്യടനത്തില്‍ ഒരു ചതുര്‍ദിന ടെസ്റ്റ് മത്സരം കൂടി ഉള്‍പ്പെടുത്തി. അഞ്ച് മത്സര ടെസ്റ്റുകളുള്ള പരമ്പരയില്‍ ആദ്യ ടെസ്റ്റിന് പിന്നാലെയാണ് ചതുര്‍ദിന ടെസ്റ്റ് കൂടി ഉള്‍പ്പെടുത്തിയിരിക്കുന്നത്.
കാന്‍ബെറയില്‍ നടക്കുന്ന ഈ ഡേ/നൈറ്റ് ടെസ്റ്റില്‍ ഭാരതവും പ്രൈം മിനിസ്റ്റേഴ്‌സ് ഇലവനും തമ്മിലാണ് മത്സരിക്കുക. നവംബര്‍ 30 മുതല്‍ ഡിസംബര്‍ ഒന്ന് വരെയാണ് ഈ ചതുര്‍ദിന പോരാട്ടം നടക്കുക.
ഭാരതം-ഓസ്‌ട്രേലിയ ടെസ്റ്റ് പരമ്പര ബോര്‍ഡര്‍-ഗവാസ്‌കര്‍ ട്രോഫിയുടെ രണ്ടാം മത്സരത്തിന് തൊട്ടുമുമ്പായാണ് പ്രൈം മിനിസ്റ്റേഴ്‌സ് ഇലവനുമായുള്ള പോരാട്ടം. നവംബര്‍ 22-26 വരെ പെര്‍ത്തിലാണ് ഓസ്‌ട്രേലിയയ്‌ക്കെതിരായ ഭാരതത്തിന്റെ ആദ്യ ടെസ്റ്റ്. ഡിസംബര്‍ ആറ്-10 വരെ ഷെഡ്യൂള്‍ ചെയ്തിട്ടുള്ള അഡ്‌ലെയ്ഡ് ടെസ്റ്റ് ഡേ/നൈറ്റ് മത്സരമായാണ് നടക്കുക.
മൂന്നാം ടെസ്റ്റ് ബ്രിസ്‌ബേനിലും നാലാം ടെസ്റ്റ് പതിവ് ബോക്‌സിങ് ഡേ ടെസ്റ്റായും നടക്കും. സിഡ്‌നിയില്‍ അടുത്തവര്‍ഷം ജനുവരി 3-7 വരെ നടക്കുന്ന അഞ്ചാം ടെസ്‌റ്റോടെ പരമ്പര പൂര്‍ത്തിയാകും.
