അമ്പലപ്പുഴ: ചരക്കുകപ്പലില്‍ നിന്ന് യുവാവിനെ കാണാതായിട്ട് 25 ദിവസം പിന്നിട്ടു. അന്വേഷണം കാര്യക്ഷമമല്ലെന്നും സര്‍ക്കാരുകള്‍ വിഷയത്തില്‍ ഇടപെടണമെന്നും മാതാപാക്കള്‍ ആവശ്യപ്പെട്ടു. പുന്നപ്ര വടക്ക് പഞ്ചായത്ത് പത്താം വാര്‍ഡ് വൃന്ദാവനം വീട്ടില്‍ ബാബു തിരുമലയുടെ മകന്‍ വിഷ്ണു ബാബു (25) വിനെയാണ് കാണാതായത്. ജൂലൈ പതിനെട്ടിനാണ് ഒഡീഷയില്‍ നിന്ന് ചൈനയിലെ പാരദ്വീപിലേക്ക് പോയ കപ്പലില്‍ നിന്ന് വിഷ്ണുവിനെ കാണാതായത്.
വിഷ്ണുവിനൊപ്പം ജോലി ചെയ്യുന്ന തമിഴ്‌നാട് സ്വദേശി അറുമുഖന്റെ ഫോണില്‍ നിന്ന് ജൂലൈ 17ന് രാത്രി വിഷ്ണു വീട്ടിലേക്ക് വിളിച്ചിരുന്നു. തുടര്‍ന്ന് അടുത്ത ദിവസം രാവിലെ സെക്കന്റ് ക്യാപ്റ്റന്‍ കപ്പലില്‍ വിളിച്ചു ചേര്‍ത്ത മീറ്റിങ്ങില്‍ വിഷ്ണു ഹാജരാകാതിരുന്നതിനെ തുടര്‍ന്നാണ് ഇദ്ദേഹത്തെ കാണാതായ വിവരം ബന്ധുക്കളെ അറിയിച്ചത്.
യാത്രാമധ്യേ സിങ്കപ്പൂര്‍ പോര്‍ട്ടില്‍ ഇന്ധനം നിറക്കുന്നതിനായി പോകുമ്പോഴാണ് വിഷ്ണുവിനെ കാണാതായത്. സംഭവത്തെ തുടര്‍ന്ന് സിങ്കപ്പൂര്‍ പോലീസ് കപ്പല്‍ കസ്റ്റഡിയിലെടുക്കുകയും വിഷ്ണുവിന്റെ ഫോണ്‍ ഉള്‍പ്പടെയുള്ള സാധനങ്ങള്‍ പരിശോധിക്കുകയും, സഹപ്രവര്‍ത്തകരെ ചോദ്യം ചെയ്യുകയുമുണ്ടായി. മലേഷ്യന്‍ മറൈന്‍ എന്‍ഫോഴ്‌സ്‌മെന്റ് ഏജന്‍സി വിഷ്ണുവിനായി തെരച്ചില്‍ നടത്തിയെങ്കിലും ഫലമുണ്ടായില്ല.
പിന്നീട് വിട്ടു നല്‍കിയ കപ്പല്‍ കഴിഞ്ഞ ദിവസം ചരക്കുമായി പാരദ്വീപിലെത്തിയതായി ബന്ധുക്കള്‍ക്ക് വിവരം ലഭിച്ചു. ഇതിനിടെ ഇന്തോനേഷ്യന്‍ എംബസി ആവശ്യപ്പെട്ടതനുസരിച്ച് വിഷ്ണുവിന്റെ വിവരങ്ങള്‍ ബന്ധുക്കള്‍ മെയില്‍ ചെയ്തു നല്‍കി. വിഷ്ണുവിന്റെ മൊബൈല്‍ ഫോണും ഉപയോഗിച്ചിരുന്ന വസ്ത്രങ്ങള്‍ ഉള്‍പ്പടെയുള്ള സാധനങ്ങളും കപ്പല്‍ അധികൃതര്‍ പിന്നീട് എത്തിച്ചു നല്‍കി. വിഷ്ണു ഉള്‍പ്പടെ 19 പേരാണ് ചെന്നൈ മറൈന്‍ ഏജന്‍സിയായ ഡെന്‍സായി മറൈന്‍ കാര്‍ ഗോ ഷിപ്പിങ് എന്ന ഏജന്‍സിയുടെ കപ്പലില്‍ ഉണ്ടായിരുന്നത്.
കെ.സി. വേണുഗോപാല്‍ എംപി, ബിജെപി നേതാവ് ശോഭാ സുരേന്ദ്രന്‍ എന്നിവര്‍ വീട് സന്ദര്‍ശിച്ച് കാര്യക്ഷമായ അന്വേഷണം ഉണ്ടാകുമെന്ന് ഉറപ്പ് നല്‍കിയിരുന്നു. ഭരണപ്രതിപക്ഷങ്ങള്‍ വിഷയത്തില്‍ ഇടപെടല്‍ നടത്തണമെന്ന് അച്ഛന്‍ ബാബു തിരുമല അഭ്യര്‍ത്ഥിച്ചു.
