വര്‍ക്കല: ടൂറിസം മേഖലയായ വര്‍ക്കല നോര്‍ത്ത് ക്ലിഫില്‍ തോക്ക് ചൂണ്ടി ഭീകരാന്തരീക്ഷം സൃഷ്ടിച്ചയാള്‍ അറസ്റ്റില്‍. ക്ലിഫിലെ ഒരു സ്പായില്‍ മസാജിംഗിന് വന്ന വട്ടപ്പാറ കണക്കോട് രാജഭവനില്‍ ജി.പി. കുമാര്‍ ആണ് പോലീസിന്റെ പിടിയിലായത്.
മസാജിങ് സെന്ററിലെ റേറ്റ് സംബന്ധിച്ചുള്ള തര്‍ക്കത്തിനിടെ സ്പായിലെ റിസപ്ഷനിസ്റ്റിനെ തോക്ക് ചൂണ്ടി ഭീഷണിപ്പെടുത്തുകയും ഭയന്ന് നിലവിളിച്ച റിസപ്ഷനിസ്റ്റിന്റെ ബഹളം കേട്ട് നാട്ടുകാര്‍ ഓടിക്കൂടുകയും ഇയാളെ കീഴ്‌പ്പെടുത്തി പോലീസിനെ ഏല്‍പ്പിക്കുകയുമായിരുന്നു. ലൈസന്‍സ് ഇല്ലാത്ത തോക്കും തിരകളുമായി എത്തിയ പ്രതിക്കെതിരെ ആംസ് ആക്ട് പ്രകാരം കേസ് രജിസ്റ്റര്‍ ചെയ്തു വര്‍ക്കല കോടതിയില്‍ ഹാജരാക്കി.
