വയനാട് : ഉരുള്പൊട്ടലിന്റെ പശ്ചാത്തലത്തില് ക്യാമ്പുകളില് കഴിയുന്നവരുടെ താത്ക്കാലിക പുനരധിവാസം ഉറപ്പാക്കാന് പൊതുമരാമത്ത് വകുപ്പിന്റെ 27 ക്വാട്ടേഴ്സുകള് ഉള്പ്പെടെ 91 സര്ക്കാര് ക്വാര്ട്ടേഴ്സുകള് ലഭ്യമാക്കുമെന്ന് മന്ത്രി പി എ മുഹമ്മദ് റിയാസ്.അടിയന്തര പുനരധിവാസത്തിന് ലഭ്യമായ എല്ലാ സംവിധാനങ്ങളും ഉപയോഗപ്പെടുത്തുകയാണ് സര്ക്കാര് ലക്ഷ്യമിടുന്നത്.
ആദ്യഘട്ടത്തില് പൊതുമരാമത്തിന്റെ 27 ക്വാര്ട്ടേഴ്സുകളാണ് വിട്ടുനല്കുന്നത്. മൂന്ന് കിടപ്പുമുറികള്, വലിയ ഭക്ഷണ ഹാള്, അടുക്കള, സ്റ്റോര് റൂം, വര്ക്ക് ഏരിയ എന്നിവ ഉള്പ്പെടുന്ന ക്വാര്ട്ടേഴ്സുകളാണ് വിട്ടു നല്കുന്നത്.
മൂന്ന് കുടുംബങ്ങളില് നിന്നുള്ള പതിനഞ്ചോളം പേര്ക്ക് ഒരുമിച്ച് താമസിക്കാന് ഒരു ക്വാര്ട്ടേഴ്സില് സൗകര്യം ഉണ്ടാകും.
പുനരധിവാസ പ്രവര്ത്തനങ്ങള് കാര്യക്ഷമമാക്കാന് ത്രിതല പഞ്ചായത്ത് പരിധികളില് ഒഴിഞ്ഞ് കിടക്കുന്ന വീടുകള്, ഫ്ളാറ്റുകള്, ഹോസ്റ്റലുകള് തുടങ്ങിയവയുടെ പട്ടിക അടിയന്തരമായി നല്കാന് തദ്ദേശസ്ഥാപന മേധാവികള്ക്ക് കര്ശന നിര്ദേശം നല്കിയിട്ടുണ്ടെന്ന് റവന്യൂ മന്ത്രി കെ രാജന് പറഞ്ഞു.
പുനരധിവാസത്തിന് സൗകര്യമൊരുക്കുന്ന കാര്യത്തില് മാതൃകാപരമായ പ്രവര്ത്തനങ്ങളാണ് ഉദ്യോഗസ്ഥര് നടത്തുന്നതെന്ന് വനം മന്ത്രി എ കെ ശശീന്ദ്രന് പറഞ്ഞു. പുനരധിവാസത്തിനായി വിട്ടുനല്കുന്ന കല്പ്പറ്റയിലെ പൊതുമരാമത്ത് ക്വാട്ടേഴ്സുകള് സന്ദര്ശിച്ച ശേഷം സംസാരിക്കുകയായിരുന്നു മന്ത്രിമാര്.
