ഇടുക്കി: യുവാവിനെ കാറില് കെട്ടിയിട്ട് ക്വട്ടേഷന് സംഘം ഫോണ് പിടിച്ചു പറിച്ചു. കല്ലാര്കുട്ടിയില് വച്ചാണ് കുഞ്ചിത്തണ്ണി ഉപ്പാര് സ്വദേശി സുമേഷ് സോമനെ അഞ്ചംഗ സംഘം ആക്രമിച്ചത്. കൈകാലുകള് കാറിന്റെ സീറ്റിനോട് ചേര്ത്ത് കെട്ടിയ ശേഷം രണ്ട് ഫോണുകള് അക്രമികള് പിടിച്ചു പറിക്കുകയായിരുന്നു.
ക്വട്ടേഷനു പിന്നില് പെണ് സുഹൃത്താണെന്ന് യുവാവ് പൊലീസിന് മൊഴി നല്കി.ആക്രമണത്തില് പരിക്കേറ്റ സുമേഷ് ആശുപത്രിയില് ചികിത്സ തേടി. പുലര്ച്ചെ ഇതുവഴി പോയ വഴിയാത്രക്കാരാണ് സുമേഷിനെ അടിമാലി താലൂക്ക് ആശുപത്രിയില് എത്തിച്ചത്. യുവാവിന്റെ കൈക്കും കഴുത്തിനും പരിക്കേറ്റിട്ടുണ്ട്.
ഇന്ഫോപാര്ക്ക് ജീവനക്കാരനാണ് സുമേഷ് സോമന്. നാട്ടുകാരിയായ പെണ് സുഹൃത്തുമായി ഒരുമിച്ചായിരുന്നു താമസം. ഇതിനിടയില് ഇരുവരും പിണങ്ങി. സുമേഷ് സ്വകാര്യ ദൃശ്യങ്ങളും ശബ്ദസന്ദേശങ്ങളും ഇന്സ്റ്റഗ്രാമിലൂടെ പ്രചരിപ്പിച്ചെന്ന് കാട്ടി യുവതി ഇന്ഫോ പാര്ക്ക് പൊലീസില് പരാതി നല്കിയിരുന്നു.കേസില് ഫോണ് ഹാജരാക്കാന് പൊലീസ് ആവശ്യപ്പെട്ടിരുന്നു.
സുമേഷിന്റെ പരാതിയില് അടിമാലി പൊലീസ് അന്വേഷണം ആരംഭിച്ചു.
