കൊച്ചി:സിനിമ റിവ്യുവിന്റെ പേരില്‍ നടി-നടന്‍മാര്‍ക്കെതിരെ അശ്ലീല പ്രയോഗങ്ങള്‍ നടത്തിയ യുട്യൂബര്‍ക്ക് പൊലീസിന്റെ താക്കീത്. ആറാട്ട് അണ്ണന്‍ എന്ന സന്തോഷ് വര്‍ക്കിയെയാണ് പാലാരിവട്ടം പൊലീസ് താക്കീത് ചെയ്തു വിട്ടയച്ചത്.
താരങ്ങളെയും കുടുംബാംഗങ്ങളെയും അശ്ലീല പദങ്ങള്‍ ഉപയോഗിച്ച് സമൂഹ മാധ്യമത്തില്‍ അവഹേളിക്കുന്നുവെന്ന് കാട്ടി നടന്‍ ബാല താരസംഘടനയായ അമ്മയിലും പാലാരിവട്ടം പൊലീസിലും പരാതി നല്‍കിയിരുന്നു.മുമ്പ് നടന്‍ ബാലയെയും സന്തോഷ് വര്‍ക്കി സമൂഹ മാധ്യമത്തിലൂടെ അധിക്ഷേപിച്ചിരുന്നു.
പൊലീസ് സ്റ്റേഷനില്‍ വിളിച്ചുവരുത്തിയ സന്തോഷ് വര്‍ക്കി മേലില്‍ ഇത്തരം കാര്യങ്ങള്‍ ആവര്‍ത്തിക്കില്ലെന്ന് എഴുതി ഒപ്പുവച്ചു. ഉന്നത പൊലീസ് ഉദ്യോഗസ്ഥരുടെ സാന്നിധ്യത്തിലായിരുന്നു ഇത്. ഇനിയും ഇത്തരം കാര്യങ്ങള്‍ ആവര്‍ത്തിച്ചാല്‍ കേസെടുക്കുമെന്ന് പൊലീസ് മുന്നറിയിപ്പ് നല്‍കി.
തന്റെ പരാതിയില്‍ സന്തോഷ് വര്‍ക്കിക്ക് തെറ്റു തിരുത്താനുള്ള അവസരമാണ് നല്‍കിയതെന്ന് ബാല പറഞ്ഞുപ്രതികരിച്ചു.
