കൊച്ചി: പനമ്പിള്ളി നഗറില് പിഞ്ചുകുഞ്ഞിനെ ഫ്ലാറ്റില് നിന്നെറിഞ്ഞു കൊലപ്പെടുത്തിയ കേസില് പ്രതിയായ അമ്മയ്ക്ക് ഹൈക്കോടതി ജാമ്യം അനുവദിച്ചു. എറണാകുളം ജില്ല വിട്ടുപോകരുതെന്നുള്പ്പെടെയുള്ള കര്ശന ഉപാധികളോടെയാണ് ജാമ്യം.
കേസ് അന്വേഷണം പൂര്ത്തിയായി. കുഞ്ഞിന്റെ അമ്മയായ 23 വയസുകാരി ലൈംഗിത അതിക്രമ കേസില് അതിജീവിതയാണെന്നുമുള്ള പ്രതിഭാഗം വാദം കൂടി പരിഗണിച്ചാണ് കോടതി ജാമ്യം അനുവദിച്ചത്.
കഴിഞ്ഞ മേയ് മാസത്തിലാണ് കേരളത്തെ ഞെട്ടിച്ച സംഭവം ഉണ്ടായത്. കൊച്ചി പനമ്പള്ളി നഗറിലെ ഫ്ലാറ്റില് നിന്നാണ് അമ്മ പ്രസവിച്ച ഉടന് ചോരകുഞ്ഞിനെ റോഡിലേക്ക് വലിച്ചെറിഞ്ഞ് കൊലപ്പെടുത്തിയത്.അവിഹിത ബന്ധത്തിലുണ്ടായ കുഞ്ഞിനെ ഇല്ലാതാക്കുകയായിരുന്നു ലക്ഷ്യം.
ശുചീകരണത്തൊഴിലാളികളാണ് നടുറോഡില് പൊക്കിള്ക്കൊടിപോലും മുറിച്ചുമാറ്റാത്ത നിലയില് നവജാത ശിശുവിന്റെ ശരീരം ആദ്യം കണ്ടത്. റോഡിലേക്ക് വീണ കുഞ്ഞിനെ പൊതിഞ്ഞിരുന്ന കവര് കേന്ദ്രീകരിച്ചുളള അന്വേഷണത്തിലാണ് പ്രസവിച്ച അമ്മയെ കണ്ടെത്തിയത്. അപ്പോള് മാത്രമാണ് യുവതിയുടെ മാതാപിതാക്കള് സംഭവമറിയുന്നത്.
