രണ്ടു ദേശീയപാത നിര്‍മ്മാണത്തിന്റെ ജിഎസ് റ്റി വിഹിതവും റോയല്‍റ്റിയും ഒഴിവാക്കുന്നു

തിരുവനന്തപുരം: സംസ്ഥാനത്തെ എറണാകുളം ബൈപാസ് (NH 544), കൊല്ലം – ചെങ്കോട്ട (NH 744) എന്നീ ദേശീയപാത നിര്‍മാണത്തിന് ജിഎസ് റ്റി
വിഹിതവും റോയല്‍റ്റിയും ഒഴിവാക്കി സംസ്ഥാന പൊതുമരാമത്ത് വകുപ്പ് ഉത്തരവിറക്കി. രണ്ടു പാത നിര്‍മ്മാണങ്ങള്‍ക്കുമായി 741.35 കോടി രൂപയുടെ സാമ്പത്തിക ബാധ്യതയാണ് ഇതുമൂലം സംസ്ഥാനത്തിന് ഉണ്ടാവുകയെന്ന് അധികൃതര്‍ പറയുന്നു.
44.7 കിലോ മീറ്റര്‍ ദൈര്‍ഘ്യം വരുന്ന എറണാകുളം ബൈപ്പാസ് ദേശീയപാത 544 ലെ തിരക്ക് ഒഴിവാക്കുന്നതിനുള്ള പദ്ധതിയാണ്. എറണാകുളം ബൈപ്പാസിന് വേണ്ടി മാത്രമായി 424 കോടി രൂപ സംസ്ഥാനത്തിന് സാമ്പത്തിക ബാധ്യത ഉണ്ടാകും. NH 744 ല്‍ 61.62 കിലോ മീറ്ററില്‍ കൊല്ലം – ചെങ്കോട്ട ഗ്രീന്‍ഫീല്‍ഡ് പാത നിര്‍മ്മാണമാണ് നടക്കുന്നത്. ഇതിന് ജിഎസ്റ്റി വിഹിതവും റോയല്‍റ്റിയും ഒഴിവാക്കുക വഴി 317.35 കോടി രൂപ സംസ്ഥാനം വഹിക്കേണ്ടി വരും. ദേശീയപാത അതോറിറ്റിയുമായി ചേര്‍ന്ന് ഈ രണ്ട് ദേശീയപാതാ പ്രവൃത്തികളും മുന്നോട്ടു കൊണ്ടു പോകുമെന്ന് മന്ത്രി പറഞ്ഞു.