മലപ്പുറം: സംസ്ഥാനത്ത് പനിബാധിതരുടെ എണ്ണം നിയന്ത്രണതീതമായി തുടരുന്നതിനിടെ മലപ്പു റത്ത് ഒരാൾക്ക് കൂടി എച്ച്വൺഎൻവൺ സ്ഥിരീകരിച്ചു. ഇതോടെ രോഗബാധിതരുടെ എണ്ണം 12 ആയി. ജൂലായ് 1 മുതൽ 7 വരെയുള്ള ദിവസങ്ങളിലാണ് ഇത്രയും പേർ എച്ച്1എൻ1ന് ചികിത്സ തേടിയത്. ഈ വർഷം ജില്ലയിൽ 30 കേസുകൾ ഇതുവരെ സ്ഥിരീകരിച്ചിട്ടുണ്ട്. കൂടുതൽ പേർക്ക് രോഗം ബാധിക്കാൻ സാധ്യതയുണ്ടെന്നാണ് ആരോഗ്യ വകുപ്പ് അറിയിക്കുന്നത്.
മലപ്പുറം വഴിക്കടവിലാണ് പുതുതായി രോഗം സ്ഥിരീകരിച്ചത്. സംസ്ഥാനത്ത് ഡെങ്കിപ്പനി, എലിപ്പനി, കോളറ, എച്ച് 1 എൻ 1, വെസ്റ്റ് നെയ്ൽ, അമീബിക് മസ്തിഷ്ക ജ്വരം എന്നിങ്ങനെ രോഗങ്ങളുടെ പട്ടിക നീളുകയാണ്. ഒരാഴ്ചയ്ക്കിടെ 8379 പേർക്കാണ് പനി ബാധിച്ചത്. 24 മണിക്കൂറിനിടെ 13,756 പേർ പനി ബാധിച്ച് വിവിധ ആശുപത്രികളിൽ ചികിത്സ തേടിയതായാണ് ഇന്നലെ ആരോഗ്യ വകുപ്പ് അറിയിച്ചത്.
ഇതിന് പിന്നാലെ ജലദോഷം, പനി, ചുമ, കഫക്കെട്ട് തുടങ്ങി ഏതെങ്കിലും തരത്തിലുള്ള രോഗ ലക്ഷണങ്ങൾ ഉണ്ടായാൽ ഉടൻ തന്നെ അടുത്തുള്ള ആരോഗ്യ കേന്ദ്രത്തിൽ വിദഗ്ദ സഹായം തേടണമെന്ന് ആരോഗ്യവകുപ്പ് അധികൃതർ അറിയിച്ചു. ജൂലൈ ഒമ്പതിന് മാത്രം 225 പേർക്ക് ഡെങ്കിപ്പനി സ്ഥിരീകരിച്ചു. രോഗം സ്ഥിരീകരിച്ചവരിൽ ഒരാൾ മരിക്കുകയും ചെയ്തു. സംസ്ഥാനത്ത് 20 പേർക്ക് എലിപ്പനിയും സ്ഥിരീകരിച്ചിട്ടുണ്ട്. രണ്ട് പേർ എലിപ്പനി ബാധിച്ച് മരിച്ചു.
തിരുവനന്തപുരം നെയ്യാറ്റിന്കരയില് ഭിന്നശേഷിക്കാരുടെ ഹോസ്റ്റലിൽ ഇന്നലെ രണ്ട് പേര്ക്ക് കൂടി കോളറ സ്ഥിരീകരിച്ചിരുന്നു. അതേസമയം കോഴിക്കോടിന് പുറമെ തൃശ്ശൂരിലും അമീബിക് മസ്തിഷ്ക ജ്വരം സ്ഥിരീകരിച്ചു. പാടൂര് സ്വദേശിയായ ഏഴാം ക്ലാസ് വിദ്യാര്ത്ഥിക്കാണ് വെര്മമീബ വെര്മിഫോര്സിസ് എന്ന അണുബാധ സ്ഥിരീകരിച്ചത്. ആദ്യമായാണ് അമീബിക് മസ്തിഷ്കജ്വരം തൃശൂരില് സ്ഥിരീകരിക്കുന്നത്.
കുട്ടിയുടെ ആരോഗ്യനില തൃപ്തികരമാണെന്ന് ആരോഗ്യവകുപ്പ് അറിയിച്ചു. കൊച്ചി അമൃത ആശുപത്രിയിലാണ് കുട്ടി ചികിത്സയില് കഴിയുന്നത്. ആരോഗ്യനില മെച്ചപ്പെട്ടതിനെ തുടര്ന്ന് കുട്ടിയെ കഴിഞ്ഞ ദിവസം ഐസിയുവില് നിന്ന് മുറിയിലേക്ക് മാറ്റി. കോഴിക്കോട് സ്ഥിരീകരിച്ചതിനേക്കാള് തീവ്രത കുറഞ്ഞ അണുബാധയാണ് ഇതെന്നാണ് ഡോക്ടർമാർ വിവരം.
