കോട്ടയം: പല പല കൊള്ളരുതായ്‌മകളും മഹത്വവല്‍ക്കരിക്കുന്ന പുതിയ കാല മലയാള സിനിമയുടെ മാഫിയാവത്കരണത്തിനെതിരെ മലയാള ചലച്ചിത്ര നിര്‍മ്മാതാവും നടിയുമായ സാന്ദ്രാ തോമസ് രംഗത്തുവന്നു. ‘സ്ത്രീ സൗഹാര്‍ദ്ദ ഇന്‍ഡസ്ട്രി ആണുപോലും’ എന്ന തലക്കെട്ടില്‍ എഴുതിയ കുറിപ്പിന്‌റെ പൂര്‍ണ്ണ രൂപം:
സിനിമ ഇറങ്ങിയ അദ്യ ആഴ്ച പോസ്റ്ററുകള്‍ ഒട്ടിക്കാതെ കബളിപ്പിക്കുക, ചോദിക്കുമ്പോള്‍ മഴയായിരുന്നു എന്ന മുട്ടാപ്പോക്കു ന്യായം പറയുക . മറ്റ് പടങ്ങളുടേത് ഉണ്ടല്ലോ എന്ന് ചോദിക്കുമ്പോള്‍ അത് ചോദിക്കാന്‍ നിങ്ങളാരാ എന്ന ധാര്‍ഷ്ട്യം. ഒരു ഫാമിലി സിനിമയായ ലിറ്റലെ ഹെര്‍ട്‌സിന് രാവിലെയുള്ള ഷോസ് നല്‍കുക, കുടുംബപ്രേക്ഷകര്‍ ഇറങ്ങുന്ന സമയമായ വൈകുന്നേരങ്ങളില്‍ അഭിപ്രായം കുറഞ്ഞ മറ്റ് പടങ്ങള്‍ കളിപ്പിക്കുക.
ഫ്രീ ടിക്കറ്റ് കൊടുത്ത് ആളെ കുത്തിക്കയറ്റി ഫേക്ക് സക്‌സസ് കാണിക്കുന്ന അണ്‍ഫെയര്‍ പ്രാക്ടീസ് നടത്തി കണ്ണടച്ച് ഇരുട്ടാക്കുക. കൊച്ചു ചിത്രങ്ങള്‍ വരെ ആളെ കയറ്റി സിനിമ വിജയമാണെന്ന് കൊട്ടിഘോഷികുമ്പോള്‍ മറ്റ് നിര്‍മ്മാതാക്കളും വിതരണക്കാരും ആ വഴിക്ക് നീങ്ങാന്‍ നിര്‍ബന്ധിതരാകുകയാണ്. അതിനെതിരെ ആരും ഒരക്ഷരവും മിണ്ടി കണ്ടില്ല.
പടം നിര്‍മ്മിച്ച് പൂരപ്പറമ്പില്‍ കൊണ്ടുപോയി കാണിച്ചു കൊടുക്കുന്ന അവസ്ഥയാണിപ്പോള്‍. ഇങ്ങനെയുള്ള കൊള്ളയ്‌ക്ക് ചുക്കാന്‍ പിടിക്കുന്ന കുറെ പി.ആര്‍ ഏജന്‍സികളുമുണ്ട്. Book my show, IMDB rating, Antipiracy എന്നൊക്കെ പേരില്‍ ഇവിടെ നടക്കുന്ന കൊടും കൊള്ളകള്‍ ശ്രദ്ധയില്‍ പെട്ടിട്ടും അധികാരപ്പെട്ടവര്‍ കല്ലിന് കാറ്റു പിടിച്ചപോലെ നോക്കുകുത്തികള്‍ മാത്രമായിരിക്കുകയാണ്.
