തിരുവനന്തപുരം: ഏഴ് മാസം പ്രായമുള്ള പെണ്‍കുഞ്ഞിനെ വീട്ടിനകത്ത് കയറി തട്ടിയെടുക്കാന്‍ ശ്രമിച്ച ആന്ധ്രാ പ്രദേശ് സ്വദേശിയെയും സുഹൃത്തിനെയും നാട്ടുകാര്‍ പിടികൂടി. വിതുര തോട്ടുമുക്കില്‍ വെളളിയാഴ്ച രാവിലെ ഒമ്പത് മണിയോടെയായിരുന്നു സംഭവം.തോട്ടുമുക്ക് സ്വദേശി ഷാനിന്റെ കുഞ്ഞിനെയാണ് ആന്ധ്രാ സ്വദേശി ഈശ്വരപ്പ തട്ടി കൊണ്ടു പോകാന്‍ ശ്രമിച്ചത്.
ഷാനും ഭാര്യയും രണ്ട് കുട്ടികളും വീട്ടിലുളളപ്പോഴാണ് സംഭവം. മൂത്ത കുട്ടിയ്‌ക്ക് ഷാനിന്റെ ഭാര്യ ആഹാരം കൊടുക്കവെ ഇളയ കുഞ്ഞ് സിറ്റൗട്ടിന് സമീപമുള്ള ഹാളില്‍ കിടക്കുകയായിരുന്നു. ഈ സമയം സിറ്റൗട്ടില്‍ എത്തിയ ഈശ്വരപ്പ മുട്ടിലിഴഞ്ഞ് കുഞ്ഞിന് സമീപമെത്തി തട്ടിയെടുക്കാന്‍ ശ്രമിക്കുകയായിരുന്നു. എന്നാല്‍ ഈ സമയം ഷാന്‍ കടന്നു വന്നപ്പോള്‍ ഈശ്വരപ്പയെ കണ്ടു. പെട്ടെന്ന് ഇയാള്‍ ഷാനോട് ഭിക്ഷ ചോദിക്കുകയും പിന്നാലെ ഓടിരക്ഷപ്പെടുകയുമായിരുന്നു.
തുടര്‍ന്ന് ഷാന്‍ നാട്ടുകാരുടെ സഹായത്തോടെ ഇയാളെ പിടികൂടി വിതുര പൊലീസില്‍ ഏല്‍പ്പിച്ചു. സമീപത്തുള്ള ആനപ്പെട്ടിയില്‍ നിന്നാണ് ഈശ്വരപ്പയുടെ സുഹൃത്ത് രേവണ്ണയെ പിടികൂടിയത്.
