കണ്ണൂര്‍: കാട് വെട്ടിത്തെളിക്കവെ വൈദ്യുതാഘാതമേറ്റ തൊഴിലാളിയെ എക്‌സൈസ് ഉദ്യോഗസ്ഥര്‍ രക്ഷപ്പെടുത്തി. ന്യൂ മാഹി ടൗണിന് സമീപം പറമ്പില്‍ കാട് വൃത്തിയാക്കവെയാണ് വൈദ്യുതി ലൈനില്‍ നിന്ന് പവിത്രന്‍ എന്നയാള്‍ക്ക് വൈദ്യുതാഘാതം ഏറ്റത്.
ഒരു അസാധാരണ ശബ്ദം കേള്‍ക്കുകയും മിന്നല്‍ പോലൊരു വെളിച്ചം കാണുകയും ചെയ്ത സമീപത്തെ ന്യൂ മാഹി എക്‌സൈസ് ചെക്ക്‌പോസ്റ്റിലെ ഉദ്യോഗസ്ഥര്‍ ഓടിയെത്തിയപ്പോഴാണ് പവിത്രനെ വൈദ്യുതാഘാതമേറ്റ നിലയില്‍ കണ്ടത്.ഉടന്‍ തന്നെ അസിസ്റ്റന്റ് എക്‌സൈസ് ഇന്‍സ്‌പെക്ടര്‍ വി കെ ഷിബു പവിത്രനെ വൈദ്യുതി ബന്ധത്തില്‍ നിന്നും വേര്‍പെടുത്തി. പ്രഥമ ശുശ്രൂഷ നല്‍കിയശേഷം മാഹി സര്‍ക്കാര്‍ ആശുപത്രിയില്‍ എത്തിച്ചു.
അപകട നില മാറി ആശുപത്രിയില്‍ നിന്നും തിരിച്ചു വരവെ, തന്നെ ജീവിതത്തിലേക്ക് തിരിച്ചു നടത്തിച്ച എക്‌സൈസ് ഉദ്യോഗസ്ഥര്‍ക്ക് പവിത്രന്‍ നന്ദി അറിയിച്ചു.
അസിസ്റ്റന്റ് എക്‌സൈസ് ഇന്‍സ്‌പെക്ടര്‍(ജി)വി കെ ഷിബു, പ്രിവന്റീവ് ഓഫീസര്‍ (ജി) കെ രാജീവന്‍, സിവില്‍ എക്‌സൈസ് ഓഫീസര്‍ വി കെ ഫൈസല്‍ എന്നിവരാണ് സമയോചിതമായി പ്രവര്‍ത്തിച്ച് പവിത്രന്റെ ജീവന്‍ രക്ഷിച്ചത്.
