തൃശൂര്‍: ലോക്‌സഭാ തെരഞ്ഞെടുപ്പില്‍ മിന്നും വിജയം നേടിയ സുരേഷ് ഗോപി തൃശൂര്‍ നഗരത്തില്‍ റോഡ് ഷോ നടത്തി. വിദ്യാര്‍ഥി കോര്‍ണറില്‍ നിന്ന് ആരംഭിച്ച റോഡ് ഷോയില്‍ ആയിരക്കണക്കിന് എന്‍ ഡി എ പ്രവര്‍ത്തകരാണ് അണിനിരന്നത്.
റോഡിന്റെ ഇരുവശങ്ങളിലും തങ്ങളുടെ പുതിയ എം പിയെ കാണാന്‍ ജനം തടിച്ചു കൂടിയിരുന്നു. ഏഴ് മണ്ഡലങ്ങളിലും സുരേഷ് ഗോപി റോഡ് ഷോ നടത്തുമെന്നാണ് റിപ്പോര്‍ട്ട്. തൃശൂരിനെ ഹൃദയത്തില്‍ വച്ച് പ്രവര്‍ത്തിക്കുമെന്ന് സുരേഷ് ഗോപി പറഞ്ഞു.
തനിക്ക് മുന്‍തൂക്കം ലഭിക്കാത്ത ഗുരുവായൂരിലും മുന്നില്‍ എത്താന്‍ പ്രയത്‌നിക്കും. തൃശൂര്‍ പൂരം നടത്തിപ്പിന് ഇത്തവണ ഉണ്ടായ പ്രശ്‌നം ഒഴിവാക്കാന്‍ ഇടപെടും. മന്ത്രിയാകുമോ എന്നത് പാര്‍ട്ടി നേതൃത്വം തീരുമാനിക്കും- സുരേഷ് ഗോപി പറഞ്ഞു.
ഇപ്രാവശ്യം സ്ത്രീ വോട്ടുകള്‍ ഒരുപാട് കിട്ടി. എല്ലാ വിഭാഗത്തില്‍പ്പെട്ടവരും വോട്ടു ചെയ്തു. ക്രിസ്ത്യന്‍, മുസ്ലിം സ്ത്രീ വോട്ടര്‍മാര്‍ ഒപ്പം നിന്നുവെന്നും സുരേഷ് ഗോപി പറഞ്ഞു.
റോഡ് ഷോയില്‍ ബി ജെ പി സംസ്ഥാന അധ്യക്ഷന്‍ കെ സുരേന്ദ്രന്‍ ഉള്‍പ്പെടെ ഉളള നേതാക്കളും പങ്കെടുത്തു.
നേരത്തേ നെടുമ്പാശേരി വിമാനത്താവളത്തില്‍ സുരേഷ് ഗോപിക്ക് പ്രവര്‍ത്തകര്‍ വലിയ സ്വീകരണം നല്‍കി. ഇവിടെ നിന്ന് സ്വന്തം വാഹനത്തിലാണ് അദ്ദേഹം തൃശൂരില്‍ എത്തിയത്.
