ആലപ്പുഴ : ഭക്ഷ്യവിഷബാധ ആരോപിച്ച് പൊലീസുകാരന്‍ ഹോട്ടല്‍ അടിച്ചുതകര്‍ത്തു. കളര്‍കോടുള്ള അഹലന്‍ കുഴിമന്തി എന്ന ഹോട്ടലാണ് അടിച്ചുതകര്‍ത്തത്.
ചങ്ങനാശേരി പൊലീസ് സ്റ്റേഷനിലെ സിപിഒ ജോസഫ് ആണ് ആക്രമണം നടത്തിയത്. ഇയാള്‍ മദ്യലഹരിയിലായിരുന്നുവെന്നാണ് ഹോട്ടല്‍ ഉടമ പറയുന്നത്.
രണ്ട് ദിവസം മുമ്പ് ഇവിടെ നിന്ന് ഭക്ഷണം കഴിച്ച പൊലീസുകാരന്റെ മകന് ഭക്ഷ്യവിഷബാധയേറ്റെന്ന് ആരോപിച്ചായിരുന്നു ആക്രമണം.
പൊലീസുകാരനാണെന്നും എന്ത് വേണേലും ചെയ്യും എന്നും പറഞ്ഞായിരുന്നു ഹോട്ടല്‍ ആക്രമിച്ചത്. ഹോട്ടലുടമയെ വാക്കത്തി കൊണ്ട് വെട്ടാനും ശ്രമിച്ചു. സമീപത്തെ കടയും അടിച്ചുതകര്‍ത്ത ഇയാളെ പൊലീസ് കസ്റ്റഡിയിലെടുത്തിട്ടുണ്ട്.
