തിരുവനന്തപുരം: ശക്തമായ വേനല് മഴയെത്തുടര്ന്ന് ജില്ലയില് 11 കോടിയുടെ കൃഷിനാശം ഉണ്ടായി. ഏപ്രില് 30 മുതല് മെയ് 21 വരെ 11,33,98,000 രൂപയുടെ നഷ്ടമുണ്ടായതായാണ് കണക്ക്. ആര്യങ്കോട് ബ്ലോക്കിലാണ് കൂടുതല് നാശം 5.7 കോടി.
1789 കര്ഷകര്ക്കാണ് മഴ മൂലം കൃഷിനാശമുണ്ടായത്. 605.94 ഹെക്ടര് കൃഷിഭൂമിയില് മഴ നാശം വിതച്ചു. വാഴ കുലച്ചത് 1,56,180, കുലയ്ക്കാത്തത് 4,84,20, റബ്ബര് 20, വെറ്റില 0.200 ഹെക്ടര്, കപ്പ 8.800 ഹെക്ടര്, പച്ചക്കറി പന്തലുള്ളത് 1.700 ഹെക്ടര്, പച്ചക്കറി പന്തലില്ലാത്തത് 1.000 ഹെക്ടര് എന്നിങ്ങനെയാണ് കൃഷിനാശം സംഭവിച്ചവയുടെ കണക്ക്.
നെയ്യാറ്റിന്കര താലൂക്കില് ആരംഭിച്ച രണ്ട് ദുരിതാശ്വാസ ക്യാമ്പുകളിലായി ആറ് കുടുംബങ്ങള് കഴിയുന്നു. കുളത്തൂര് യുപി സ്കൂളില് മാര്ച്ച് 31 ന് ആരംഭിച്ച ക്യാമ്പില് രണ്ട് കുടുംബങ്ങളും (ആകെ നാലു പേര്) കോട്ടുകാല് സെന്റ് ജോസഫ് സ്കൂളില് മേയ് 20ന് ആരംഭിച്ച ക്യാമ്പില് നാല് കുടുംബങ്ങളുമാണ് (ആകെ ഏഴു പേര്) ഉള്ളത്. ആറു വീടുകള്ക്ക് ഭാഗികമായി കേടുപാടു സംഭവിച്ചു.
