പത്തനംതിട്ട: സിപിഎം മുഖപത്രം ‘ദേശാഭിമാനി’ വരുത്താന്‍ തയാറാകാതിരുന്ന പശ്ചാത്തലത്തില്‍ കുടുംബശ്രീ ഹോട്ടല്‍ സംരംഭകരെ ഡിടിപിസി കെട്ടിടത്തില്‍ നിന്ന് ഒഴിപ്പിച്ചു. പത്തനംതിട്ട മലയാലപ്പുഴയിലാണ് സംഭവം.
വനിതാ സംരംഭകര്‍ക്കാണ് കെട്ടിടം ഒഴിയേണ്ടി വന്നത്. ഇതോടെ വായ്‌പയെടുത്ത് നടത്തി വന്ന ഇവരുടെ വരുമാനവും നിലച്ച അവസ്ഥയാണ്.
കുടുംബശ്രീ ഹോട്ടല്‍ ജീവനക്കാരായ ആറ് വനിതകളും പത്രത്തിന്റെ വരിക്കാരാകണമെന്ന് പ്രാദേശിക സിപിഎം നേതൃത്വം ആവശ്യപ്പെട്ടു. എന്നാല്‍, ഹോട്ടലില്‍ നിന്നുളള വരുമാനം കുറവായതിനാല്‍ ജീവനക്കാര്‍ ഇതിന് തയാറായില്ല. ഇതോടെ പത്ത് വര്‍ഷമായി പ്രവര്‍ത്തിച്ചുവന്ന കുടുംബശ്രീ ഹോട്ടല്‍ സംരംഭകരെ ഒഴിവാക്കുകയായരിുന്നു.
പുതിയ ആളുകള്‍ക്ക് കരാര്‍ നല്‍കുകയും ചെയ്തു. ഇത് രാഷ്‌ട്രീയ പ്രേരിതമാണെന്നാണ് വനിതാ സംരംഭകരുടെ ആരോപണം.
എന്നാല്‍, പത്ത് വര്‍ഷമായി ഒരേ സംരംഭകര്‍ക്ക് നല്‍കുന്നതില്‍ ഓഡിറ്റില്‍ പ്രശ്നം വന്നെന്നും തുടര്‍ന്ന് നിയമപരമായി ടെന്‍ഡര്‍ വിളിച്ച് മറ്റ് ആളുകള്‍ക്ക് നല്‍കുകയായിരുന്നു എന്നുമാണ് വിഷയത്തില്‍ ഡിടിപിസിയുടെ ന്യായം.
