കാസർകോട്: സിപിഎം നേതാക്കൾക്കെതിരെ സ്‌ഫോട വസ്തു എറിഞ്ഞ് സിപിഎം പ്രവർത്തകൻ. കാഞ്ഞങ്ങാട് ഗൃഹസന്ദർശനത്തിനെത്തിയതായിരുന്നു നേതാക്കൾ. കൊലക്കേസിൽ ഉൾപ്പെടെ പ്രതിയായ ലാലൂർ സ്വദേശി രതീഷാണ് ആക്രമണം നടത്തിയത്. ലോക്കൽ സെക്രട്ടറി അടക്കമുള്ളവർ ഓടി മാറിയതിനാൽ പരിക്കേൽക്കാതെ രക്ഷപ്പെട്ടു.
ഇന്നലെ രാത്രി ഒൻപതുമണിയോടെയായിരുന്നു സംഭവം. പരിക്കേറ്റ നാട്ടുകാരിയായ കണോത്ത് തട്ട് സ്വദേശിനി ആമിന ആശുപത്രിയിൽ ചികിത്സയിലാണ്. പരിക്ക് സാരമുള്ളതല്ലെന്നാണ് വിവരം. മുന്നിലെ പാറയിൽ തട്ടി എന്തോ ഒന്ന് കണ്ണിലേക്ക് തെറിച്ചു. കൊച്ചു കുട്ടികൾ നിൽക്കുന്ന സമയത്താണ് ആക്രമണം നടന്നത് എന്നും ആമിന പറഞ്ഞു.
ലോക്കൽ സെക്രട്ടറിമാരായിരുന്ന അനൂപ്, ബാബുരാജ് ,ഡിവൈഎഫ്‌ഐ മേഖലാ സെക്രട്ടറി അരുൺ ബാലകൃഷ്ണൻ എന്നിവർക്ക് നേരെയാണ് രതീഷ് സ്‌ഫോടക വസ്തു എറിഞ്ഞത്. ഷമീർ എന്നയാളുടെ വീട്ടിലേക്ക് സിപിഎം നേതാക്കൾ ഗൃഹസന്ദർശനത്തിന് എത്തിയപ്പോഴായിരുന്നു ആക്രമണം
അതേസമയം, രതീഷിന് 2018 മുതൽ പാർട്ടിയുമായി ബന്ധമില്ലെന്ന് സിപിഎം പറഞ്ഞു. ലഹരിമാഫിയ സംഘവുമായി രതീഷിന് ബന്ധമുണ്ട്. മുൻപ് ഉണ്ടായിരുന്ന പ്രശ്നത്തിന്റെ പേരിൽ രതീഷ് ആക്രമണം നടത്തുകയായിരുന്നു എന്നും സിപിഎം പറഞ്ഞു.
