കണ്ണൂര്‍ :യാത്രക്കാരുടെ എണ്ണം കുറഞ്ഞതോടെ തലശേരിയിലെ കെ എസ് ആര്‍ ടി സി ഡബിള്‍ ഡക്കര്‍ ബസ് സര്‍വീസ് താത്കാലം നിര്‍ത്തി. പൈതൃക ടൂറിസത്തിനായി എത്തിച്ച ഡബിള്‍ ഡക്കര്‍ ബസാണ് പ്രതിദിന സര്‍വീസ് നിര്‍ത്തിയത്.
സര്‍വീസ് തുടങ്ങി രണ്ടുമാസം കഴിയുമ്പോഴാണ് സര്‍വീസ് താത്കാലികമായെങ്കിലും നിര്‍ത്തിയത്.തിരുവനന്തപുരത്ത് നിന്ന് തലശേരിയിലെത്തിച്ച ബസ് ഫെബ്രുവരി 22-ന് മന്ത്രി കെ.ബി.ഗണേഷ്‌കുമാറും സ്പീക്കര്‍ എ.എന്‍.ഷംസീറും യാത്ര ചെയ്താണ് ഉദ്ഘാടനം ചെയ്തത്.
തലശേരി പൈതൃക ടൂറിസം പദ്ധതി ജനകീയമാക്കുക ലക്ഷ്യമിട്ട് സ്പീക്കര്‍ എ.എന്‍.ഷംസീര്‍ മുന്‍കൈയെടുത്താണ് ബസ് തലശേരിയിലെത്തിച്ചത്. തലശേരി ഡിപ്പോയില്‍നിന്ന് തുടങ്ങി ഇല്ലിക്കുന്ന് ഗുണ്ടര്‍ട്ട് ബംഗ്ലാവ്, കോടതി, ഓവര്‍ബറീസ് ഫോളി, കോട്ട, ഗോപാലപ്പേട്ട വഴി മാഹിയിലെത്തും. മാഹി ബസിലിക്ക പള്ളി, മാഹി പുഴയോര നടപ്പാതയില്‍നിന്ന് ബൈപ്പാസിലൂടെ മുഴപ്പിലങ്ങാട് ബീച്ച് സന്ദര്‍ശിച്ച് തലശേരി വരെയാണ് യാത്രക്രമീകരിച്ചിരുന്നത്.
ബസിന്റെ താഴത്തെ നിലയില്‍ 28 ആളുകള്‍ക്ക് ഇരിക്കാനുളള സീറ്റും രണ്ട് മേശയുമുളളപ്പോള്‍ മുകളിലത്തെ നിലയില്‍ 21 പേര്‍ക്ക് ഇരിക്കാനുള്ള സൗകര്യമുണ്ട്.
40 ആളുകള്‍വരെ ഉണ്ടെങ്കിലേ ബസ് സര്‍വീസ് നടത്തുകയുളളൂ. ഒരാള്‍ക്ക് 250 രൂപയാണ് ടിക്കറ്റ് നിരക്ക്. ഉച്ചയ്‌ക്ക് രണ്ടരയ്‌ക്ക് തുടങ്ങി എട്ടരയ്‌ക്ക് തിരിച്ചെത്തുന്ന രീതിയിലാണ് യാത്ര.
ഉച്ചയ്‌ക്കുള്ള കടുത്ത ചൂട് യാത്രക്കാരൊഴിയാന്‍ കാരണമായി
