തിരുവനന്തപുരം: ബിജെപി ഇത്തവണ കേരളത്തില്‍ 20 ശതമാനത്തിലധികം വോട്ടു നേടുമെന്ന് നേതൃസമ്മേളനത്തില്‍ അവതരിപ്പിച്ച വിശകലന റിപ്പോര്‍ട്ടുകള്‍ വ്യക്തമാക്കുന്നു. രണ്ടു സീറ്റുകളില്‍ ജയം ഉറപ്പാണ്. നാലു സീറ്റുകളില്‍ കൂടി ജയ സാധ്യതയുണ്ട്. ആറുസീറ്റുകളില്‍ 30 ശതമാനത്തിലധികം വോട്ട് ലഭിക്കും.
കഴിഞ്ഞ തവണ ബിജെപിക്ക് കിട്ടിയ 13 ശതമാനം ഉള്‍പ്പെടെ എന്‍ഡിഎയക്ക് 15.64 ശതമാനം വോട്ടാണ് നേടാനായത്. 31.30 ശതമാനം വോട്ടു നേടിയ തിരുവനന്തപുരമായിരുന്നു മുന്നില്‍. കുമ്മനം രാജശേഖരന്‍ 3,16, 141 വോട്ടുമായി രണ്ടാം സ്ഥാനത്തും എത്തി. പത്തനംതിട്ടയില്‍ കെ സുരേന്ദ്രന്‍ 28.97 ശതമാനവും തൃശ്ശൂരില്‍ സുരേഷാ ഗോപി 28.18 ശതമാനവും ആറ്റിങ്ങലില്‍ ശോഭാ സുരേന്ദ്രന്‍ 24. 96 ശതമാനവും വോട്ടു നേടിയിരുന്നു. കഴിഞ്ഞ തവണ ഒരുലക്ഷത്തില്‍ കുറവ് വോട്ടു കിട്ടിയ ആറു മണ്ഡലങ്ങള്‍ ഉണ്ടായിരുന്നു( കണ്ണൂര്‍, വടകര, വയനാട്, മലപ്പുറം, ആലത്തൂര്‍, ഇടുക്കി). ഇത്തവണ ലക്ഷത്തില്‍ കുറവ് വോട്ടുള്ള ഒരു മണ്ഡലവും കാണില്ല.
കേരളത്തില്‍ ആദ്യമായി പ്രധാനമന്ത്രി മോദിയുടെ വികസന രാഷ്‌ട്രീയത്തിന് ജനങ്ങള്‍ വോട്ട് ചെയ്തുവെന്നും സംസ്ഥാന നേതൃയോഗം വിലയിരുത്തി.
കേരളത്തില്‍ രാഷ്‌ട്രീയ മാറ്റത്തിന് തുടക്കം കുറിക്കുന്ന തിരഞ്ഞെടുപ്പ് ഫലമാവും ഉണ്ടാവുകയെന്ന് സംസ്ഥാന അദ്ധ്യക്ഷന്‍ കെ.സുരേന്ദ്രന്‍ പറഞ്ഞു.
ഇരു മുന്നണികളുടെയും വര്‍ഗീയ വിഭജന രാഷ്ടീയം തള്ളി മോദിയുടെ ഗ്യാരണ്ടി ജനം ഏറ്റെടുത്തു. കേന്ദ്രസര്‍ക്കാരിനും മോദിക്കുമെതിരായ എതിര്‍ രാഷ്‌ട്രീയ പാര്‍ട്ടികളുടെ കുപ്രചരണം ജനങ്ങള്‍ തള്ളിക്കളഞ്ഞു. എന്‍ഡിഎയുടെ വിജയം തടസപ്പെടുത്താന്‍ വലിയ ശ്രമമുണ്ടായി. ജയ സാധ്യതയുള്ള ബിജെപി സ്ഥാനാര്‍ത്ഥികള്‍ക്കെതിരെ നടന്ന വ്യക്തിഹത്യക്ക് പിന്നില്‍ കോണ്‍ഗ്രസ് നേതാക്കളാണ്. ലോകസഭാ തിരഞ്ഞെടുപ്പ് കാലത്ത് നുണപ്രചരണങ്ങള്‍ ജനം ഏറ്റെടുത്തില്ല. ബിജെപിക്ക് മേല്‍ക്കൈയുള്ള രാഷ്‌ട്രീയം സംസ്ഥാനത്ത് രൂപപ്പെട്ടു. ഫലം വരുന്നതോടെ കോണ്‍ഗ്രസിന് അടിതെറ്റും. സിപിഎം സര്‍ക്കാരിനെതിരായ ജനവികാരം സംസ്ഥാനത്ത് ശക്തമായിരുന്നുവെന്നും കെ.സുരേന്ദ്രന്‍ പറഞ്ഞു.
വടകര ഉള്‍പ്പെടെയുള്ള പല മണ്ഡലങ്ങളിലും കോണ്‍ഗ്രസും സിപിഎമ്മും വലിയ വര്‍ഗീയ പ്രചരണമാണ് നടത്തിയത്. എല്ലാ പരിധികളും ലംഘിക്കുന്ന തരത്തിലുള്ള പ്രചരമാണ് നടന്നതെന്നും ബിജെപി അദ്ധ്യക്ഷന്‍ പറഞ്ഞു.
ദക്ഷിണേന്ത്യയില്‍ ബിജെപി ഏറ്റവും വലുതും എല്ലാ സ്ഥലത്തും പ്രാതിനിധ്യവുമുള്ള രാഷ്‌ട്രീയ പാര്‍ട്ടിയാകുമെന്ന് സംസ്ഥാന പ്രഭാരി പ്രകാശ് ജാവദേക്കര്‍ പറഞ്ഞു. 400 സീറ്റ് നേടി മൂന്നാം തവണയും മോദി രാജ്യം ഭരിക്കും. കേരളത്തില്‍ എല്ലാ മണ്ഡലങ്ങളിലും ശക്തമായ ത്രികോണ മത്സരമാണ് നടന്നത്. മൂന്നാമത്തെ ശക്തിയായി എന്‍ഡിഎ കേരളത്തില്‍ മാറിയെന്നും അദ്ദേഹം പറഞ്ഞു. വാര്‍ത്താസമ്മേളനത്തില്‍ എപി അബ്ദുള്ളക്കുട്ടി, കുമ്മനം രാജശേഖരന്‍ എന്നിവരും സംബന്ധിച്ചു.
