പോര്ബന്ദര്(ഗുജറാത്ത്): പാര്ട്ടി പ്രവര്ത്തകര് ഈശ്വരനെപ്പോലെയാണെന്ന് കേന്ദ്രമന്ത്രിയും പോര്ബന്ദര് ലോക്സഭാ മണ്ഡലത്തിലെ ബിജെപി സ്ഥാനാര്ത്ഥിയുമായ മന്സുഖ് മാണ്ഡവ്യ. ബിജെപിക്കും എനിക്കും പ്രവര്ത്തകരാണ് ദൈവം. ഞാനും പാര്ട്ടി പ്രവര്ത്തകനാണ്, ഇന്നലെ രാവിലെ തെരഞ്ഞെടുപ്പ് പ്രചരണാര്ത്ഥം പോര്ബന്ദറില് പ്രവര്ത്തകര്ക്കൊപ്പം പ്രഭാതഭേരിയില് പങ്കെടുത്തതിന് ശേഷം സംസാരിക്കുകയായിരുന്നു അദ്ദേഹം.
നമ്മുടെ കഠിനാധ്വാനത്തിലൂടെ രാജ്യത്ത് ബിജെപി സര്ക്കാര് വന്നു. പത്ത് വര്ഷം രാപകല് രാജ്യത്തിന്റെ, പാവങ്ങളുടെ വികസനത്തിനായി നിരന്തരം പ്രയത്നിച്ചു. പിന്നാക്ക ജനതയുടെ, കര്ഷകരുടെ, സ്ത്രീകളുടെ, യുവാക്കളുടെ ക്ഷേമം ഉറപ്പാക്കി. ഇത് സര്ക്കാരാണ് ചെയ്തതെങ്കിലും പാര്ട്ടി പ്രവര്ത്തകരുടെ കഠിനാധ്വാനമാണ് പ്രേരണ. ഈ നിരന്തര പരിശ്രമത്തിന് ഹൃദയം കൊണ്ട് എല്ലാവരെയും അഭിവാദ്യം ചെയ്യുന്നു, മന്സുഖ് മാണ്ഡവ്യ പറഞ്ഞു.
പ്രഭാത ഭേരി ഗ്രാമങ്ങളെ ഉണര്ത്തുന്ന പരമ്പരാഗത രീതിയാണെന്ന് അദ്ദേഹം പിന്നീട് മാധ്യമപ്രവര്ത്തകരോട് പറഞ്ഞു. ഇത് നമ്മുടെ ജീവിത ശൈലിയുടെ ഭാഗമാണ്. ഭജനകളും കീര്ത്തനകളും നാടുണര്ത്തുന്ന പാട്ടുകളുമായി തെരുവുകളില് ഗ്രാമീണര് പ്രഭാതഭേരി നടത്താറുണ്ട്, അദ്ദേഹം കൂട്ടിച്ചേര്ത്തു.
