മുംബൈ: വിമാനത്താവളം വഴി സ്വര്ണം കടത്തിയ അഫ്ഗാന് നയതന്ത്ര ഉദ്യോഗസ്ഥ മുംബൈയില് പിടിയിലായി. അഫ്ഗാനിസ്ഥാന് കോണ്സുല് ജനറല് സാക്കിയ വര്ദക്കിനെയാണ് ഡയറക്ടറേറ്റ് ഓഫ് റവന്യൂ ഇന്റലിജന്സ് (ഡിആര്ഐ) മുംബൈ വിമാനത്താവളത്തില്വച്ച് പിടികൂടിയത്. ഇവരില് നിന്ന് 18.6 കോടി രൂപ വിലവരുന്ന 25 കിലോ സ്വര്ണം പിടിച്ചെടുത്തു. നയതന്ത്ര പരിരക്ഷയുള്ളതിനാല് ഇവരെ അറസ്റ്റ് ചെയ്തിട്ടില്ല.
ഏപ്രില് 25നാണ് സാക്കിയ വര്ദക് ഡിആര്ഐയുടെ പിടിയിലായത്. രഹസ്യവിവരത്തിന്റെ അടിസ്ഥാനത്തിലായിരുന്നു ഡിആര്ഐയുടെ നീക്കം. ദുബായ്യില് നിന്ന് എമിറേറ്റ്സ് വിമാനത്തില് വൈകിട്ട് 5.45ന് മകനോടൊപ്പമാണ് മുംബൈയിലെത്തിയത്. ഇരുവരും ഗ്രീന് ചാനല് വഴിയാണ് പുറത്തുകടന്നത്. വിമാനത്താവളത്തിന് പുറത്തേക്ക് പോകുന്നതിനിടെയാണ് രണ്ടുപേരെയും ഡിആര്ഐ ഉദ്യോഗസ്ഥര് തടഞ്ഞുനിര്ത്തി പരിശോധിച്ചത്. കസ്റ്റംസ് പരിശോധനയ്ക്ക് വിധേയമാക്കേണ്ട വസ്തുക്കളൊന്നും കൈയിലില്ലെന്ന് ഇവര് അവകാശപ്പെട്ടിരുന്നു.
അഞ്ച് ട്രോളി ബാഗുകളും ഒരു ഹാന്ഡ് ബാഗും ഒരു സ്ലിങ് ബാഗും ഒരു നെക്ക് പില്ലോയുമാണ് ഇരുവരുടേയും പക്കലുണ്ടായിരുന്നത്. ഡ്യൂട്ടി അടക്കേണ്ടതായ വസ്തുക്കളോ സ്വര്ണമോ കൈയിലുണ്ടോയെന്ന് ചോദിച്ചപ്പോള് ഇല്ലെന്നായിരുന്നു ഇവരുടെ മറുപടി. ഇതോടെ സാക്കിയയെ ശരീരപരിശോധനയ്ക്ക് വിധേയയാക്കി. തുടര്ന്നാണ് വസ്ത്രത്തിനുള്ളില് ഒളിപ്പിച്ചനിലയില് സ്വര്ണം കണ്ടെടുത്തത്. ജാക്കറ്റിനുള്ളിലും ലെഗ്ഗിങ്സിനുള്ളിലും ബെല്റ്റിനുള്ളിലുമാണ് സ്വര്ണം ഒളിപ്പിച്ചതെന്ന് റിപ്പോര്ട്ടുകള് പറയുന്നു. മകന്റെ പക്കല് നിന്ന് ഒന്നും കണ്ടെത്തിയില്ല.
സ്വര്ണം കണ്ടെത്തിയതിന് പിന്നാലെ ഉദ്യോഗസ്ഥര് ആവശ്യപ്പെട്ടതു പ്രകാരം രേഖകളൊന്നും ഹാജരാക്കാന് അവര്ക്ക് കഴിഞ്ഞില്ല. ഇതോടെയാണ് കസ്റ്റംസ് ആക്ട് അനുസരിച്ച് സ്വര്ണം പിടിച്ചെടുത്തതെന്നും റിപ്പോര്ട്ടുകള് പറയുന്നു.അതേ സമയം ഇന്നലെ, ഭാരതത്തിലെ അഫ്ഗാനിസ്ഥാന്റെ കോണ്സുല് ജനറല് സ്ഥാനത്തു നിന്ന് രാജിവച്ചതായി അവര് അറിയിച്ചു. നിരവധി ആക്രമണങ്ങളും മാനഹാനിയും നേരിട്ടെന്നാരോപിച്ചാണ് അവരുടെ രാജി.
