ലഖ്നൗ:മുഖത്ത് ആണുങ്ങളുടേത് പോലെ തെളിഞ്ഞ മീശയുള്ള പെണ്കുട്ടിയാണ് പ്രാചി നിഗം. അതുകൊണ്ട് ചെറുക്ലാസുകളില് തൊട്ട് മീശയുടെ പേരില് പരിഹാസിക്കപ്പെടാത്ത ദിവസമില്ല. ആണ്കുട്ടിയാണോ എന്ന ചോദ്യം തൊട്ട് ഒട്ടേറെ പരിഹാസങ്ങളാണ് പ്രാചി നിഗം എന്ന പെണ്കുട്ടി മീശയുടെ പേരില് സ്കൂളില് നേരിടേണ്ടി വന്നത്. പക്ഷെ ഈ പരിഹാസങ്ങള് എല്ലാം പൂമാലകളാക്കി എടുക്കുകയായിരുന്നു പ്രാചി നിഗം. ചാണക്യന് വരെ അപഹാസ്യമായ സ്വന്തം രൂപത്തിന്റെ പേരില് പരിഹാസം കേള്ക്കേണ്ടിവന്നിരുന്നുവെന്ന് പ്രാചി നിഗം. “എന്നിട്ട് ചാണക്യന് തളര്ന്നോ?”- പ്രാചി ചോദിക്കുന്നു.
ഒടുവില് ഉത്തര്പ്രദേശ് ബോര്ഡ് പരീക്ഷയില് (പത്താം ക്ലാസ് പരീക്ഷ) പ്രാചി നിഗത്തിന് ഒന്നാം റാങ്ക്. അതും 98.5 ശതമാനം മാര്ക്കോടെ. 600ല് 591 മാര്ക്കോടെയാണ് പ്രാചി ഒന്നാം റാങ്ക് നേടിയത്. മാർക്കാണ് പ്രധാനമെന്നും അല്ലാതെ മുഖത്തെ രോമ വളർച്ചയല്ലെന്നും പ്രാചി പറയുന്നു. ട്രോളന്മാരുടെ വാക്കുകള്ക്ക് ചെവി കൊടുക്കരുതെന്ന അമ്മയുടെ ഉപദേശമാണ് പ്രാചിക്ക് ചെറുപ്പം മുതലേ വഴികാട്ടിയത്.
ഉന്നത മാർക്ക് നേടിയ പ്രാചിയുടെ ചിത്രം സമൂഹമാധ്യമങ്ങളിൽ പ്രചരിച്ചതോടെ സമൂഹമാധ്യമങ്ങളില് പ്രാചിക്കെതിരെ പരിഹാസം ഉയര്ന്നിരുന്നു. ചാണക്യൻ പോലും രൂപത്തിന്റെ പേരിൽ കളിയാക്കപ്പെട്ടിട്ടുണ്ടെന്നും, അത് അദ്ദേഹത്തെ ബാധിച്ചിട്ടില്ലെന്നുമായിരുന്നു ഇതിന് പ്രാചി നല്കുന്ന മറുപടി.
ഒരുവിഭാഗം പേർ പ്രാചിയെ കളിയാക്കലുകൾ കൊണ്ടും അധിക്ഷേപങ്ങൾ കൊണ്ടും മൂടിയപ്പോൾ പ്രാചിയെ പിന്തുണച്ചും ആളുകൾ രംഗത്ത് വന്നിരുന്നു.
