തിരുവനന്തപുരം: മുതലപ്പൊഴിയിൽ പുലർച്ചെ വള്ളം മറിഞ്ഞുണ്ടായ അപകടത്തിൽ മത്സ്യത്തൊഴിലാളിക്ക് ദാരുണാന്ത്യം. പുതുക്കുറിച്ചി സ്വദേശി ജോൺ ആണ് മരിച്ചത്. 50 വയസായിരുന്നു. പുലർച്ചെ 3.30ഓടെയാണ് മത്സ്യബന്ധനത്തിനുപോയ വള്ളം മറിഞ്ഞത്.
വള്ളത്തിലുണ്ടായിരുന്ന മറ്റ് 5 പേർ നീന്തി രക്ഷപ്പെട്ടിരുന്നു. കാണാതായ ജോണിനായി മത്സ്യത്തൊഴിലാളികളും തീരദേശ പൊലീസും തെരച്ചിൽ തുടരുന്നതിനിടെയാണ് മൃതദേഹം കണ്ടെത്തിയത്. ചിറയിൻകീഴ് താലൂക്ക് ആശുപത്രിയിലേക്ക് മൃതദേഹം മാറ്റി.
മുതലപ്പൊഴിയിൽ വള്ളംമറിയുന്ന സംഭവങ്ങൾ പതിവാകുന്നതിൽ മത്സ്യത്തൊഴിലാളികൾ ആശങ്കയിലാണ്. കടൽ പ്രക്ഷുബ്ദമായതാണ് അപകടമുണ്ടാക്കിയതെന്നാണ് പ്രാഥമിക നിഗമനം.
