തിരുവനന്തപുരം: കോണ്ഗ്രസിന്റെ പരാജയ ഫലം അവരെ നുണ പ്രചരിപ്പിക്കാന് പ്രേരിപ്പിക്കുന്നുവെന്ന് കേന്ദ്രമന്ത്രിയും തിരുവനന്തപുരത്തെ എന്ഡിഎ സ്ഥാനാര്ത്ഥിയുമായ രാജീവ് ചന്ദ്രശേഖര് പറഞ്ഞു. തീരപ്രദേശത്തെ സാധാരണക്കാരുടെ പ്രശ്നങ്ങള്ക്ക് പരിഹാരം കാണാതെയാണ് വിദ്വേഷവും നുണ പ്രചരണവും നടത്തുന്നത്.
അധികാരത്തിലേറിയാല് അവര്ക്ക് വേണ്ടി എന്ത് ചെയ്യുമെന്നതിന്റെ വികസനരേഖയാണ് ഞാന് നല്കിയത്. എന്ഡിഎ വികസനം പറഞ്ഞാണ് വോട്ട് തേടുന്നതെന്നും അദേഹം പറഞ്ഞു. മണിപ്പൂരും സിഎഎയും പറഞ്ഞ് തീരപ്രദേശത്തെ ജനങ്ങളെ കോണ്ഗ്രസ് പേടിപ്പിക്കുന്നു. അവര് വിഡ്ഢികളല്ല, സത്യം മനസിലാക്കാനുള്ള ബുദ്ധി അവര്ക്കുണ്ട്.
15 കൊല്ലമായി അവര്ക്ക് വീടോ കുടിവെള്ളമോ ഇല്ല. കടലാക്രമണം കാരണം ഗുരുതര പ്രശ്നങ്ങളാണ് തീരമേഖലയിലെ ജനങ്ങള് അനുഭവിക്കുന്നത്. ജനങ്ങളെ പേടിപ്പിച്ച് ജയിക്കാനുള്ള ശ്രമം എന്ത് രാഷ്ട്രീയമാണ്. വോട്ട് വേണമെങ്കില് എന്ത് ചെയ്യണമെന്നാണ് പറയേണ്ടത്. 15 വര്ഷം ചെയ്തതും ഇനി ചെയ്യാന് പോകുന്നതുമായ കാര്യങ്ങള് അവര്ക്ക് മുന്നില് അവതരിപ്പിക്കണമെന്നും രാജീവ് ചന്ദ്രശേഖര് പറഞ്ഞു.
