ന്യൂദല്ഹി: വ്യക്തമായ തെളിവുകളില്ലാതെ ഹാക്കിങ്ങിനെക്കുറിച്ചും കൃത്രിമത്തെക്കുറിച്ചുമുള്ള സംശയത്തിന്റെ അടിസ്ഥാനത്തില് ഇലക്ട്രോണിക് വോട്ടിങ് യന്ത്രം സംബന്ധിച്ച് എങ്ങനെ നിര്ദേശം നല്കുമെന്ന് സുപ്രീംകോടതി.
ഇവിഎമ്മിലെ വോട്ടുകള് എണ്ണുന്നതിനൊപ്പം വിവിപാറ്റിലെ മുഴുവന് സ്ലിപ്പുകളും എണ്ണണമെന്നാവശ്യപ്പെട്ടുള്ള ഹര്ജിയിലാണ് സുപ്രീംകോടതിയുടെ ഈ ചോദ്യം. ജസ്റ്റിസ് സഞ്ജീവ് ഖന്ന, ജസ്റ്റിസ് ദീപാങ്കര് ദത്ത എന്നിവരടങ്ങിയ ബെഞ്ചാണ് വാദംകേട്ടത്. തെരഞ്ഞെടുപ്പ് കമ്മിഷന് ഉദ്യോഗസ്ഥരില് നിന്ന് ഇന്നലെ നേരിട്ട് വിശദീകരണം തേടിയ കോടതി ഹര്ജി വിധി പറയാനായി മാറ്റി.
സുപ്രീംകോടതി നിര്ദേശത്തിന്റെ അടിസ്ഥാനത്തില് തെരഞ്ഞെടുപ്പ് കമ്മിഷന് ഉദ്യോഗസ്ഥര് ഇന്നലെ ഉച്ചയ്ക്ക് രണ്ടിന് നേരിട്ട് കോടതിയില് ഹാജരായി വിവിപാറ്റ് മെഷീനുകളുടെ പ്രവര്ത്തനം വിശദീകരിച്ചു. ഒരു സാഹചര്യത്തിലും വോട്ടിങ് യന്ത്രത്തില് കൃത്രിമം സാധിക്കില്ലെന്നും നൂറുശതമാനം വിവിപാറ്റ് സ്ലിപ്പുകള് എണ്ണുക പ്രായോഗികമല്ലെന്നും കമ്മിഷന് വ്യക്തമാക്കി.
ബാലറ്റ് യൂണിറ്റ്, കണ്ട്രോള് യൂണിറ്റ്, വിവിപാറ്റ് യൂണിറ്റ് എന്നിവയടങ്ങിയതാണ് വോട്ടിങ് യന്ത്രം. ഈ മൂന്നു യൂണിറ്റുകള്ക്കും ഓരോന്നു വീതം മൈക്രോ കണ്ട്രോളര് ഉണ്ട്. ആര്ക്കും ഇടപെടാനാവാത്ത രീതിയില് സുരക്ഷിതമായാണ് ഇവ സ്ഥാപിച്ചിരിക്കുന്നത്. ഓരോ യൂണിറ്റിലും ഒറ്റത്തവണ മാത്രമേ മൈക്രോ കണ്ട്രോളര് ഉപയോഗിച്ച് പ്രോഗ്രാം ചെയ്യാനാകൂ. മൈക്രോ കണ്ട്രോളര് ഒരിക്കല് സ്ഥാപിച്ചാല് പിന്നെ ആര്ക്കും മാറ്റാനാകില്ല. പോളിങ് പൂര്ത്തിയായ ശേഷം മൂന്ന് യൂണിറ്റുകളും സീല് ചെയ്യും, തെര. കമ്മിഷന് വിശദീകരിച്ചു.
ഇലക്ട്രോണിക് വോട്ടിങ് യന്ത്രങ്ങളിലെ ഡാറ്റ 45 ദിവസം വരെ സൂക്ഷിക്കും. 46-ാമത്തെ ദിവസം ചീഫ് ഇലക്ടറല് ഓഫീസര് ഹൈക്കോടതി രജിസ്ട്രാര്ക്ക് കത്ത് അയച്ച് തെരഞ്ഞെടുപ്പുമായി ബന്ധപ്പെട്ട് കേസുകള് ഉണ്ടോയെന്ന് അന്വേഷിക്കും. കേസുകളുള്ള മണ്ഡലങ്ങളിലെ ഡാറ്റ മാത്രം സൂക്ഷിക്കുമെന്നും കമ്മിഷന് വ്യക്തമാക്കി. ഇലക്ട്രോണിക് കോര്പറേഷന് ഓഫ് ഇന്ത്യ, ഭാരത് ഹെവി ഇലക്ട്രിക്കല്സ് ലിമിറ്റഡ് എന്നീ രണ്ട് സ്ഥാപനങ്ങള് ആണ് ചിഹ്നങ്ങള് ലോഡ് ചെയ്യുന്ന യൂണിറ്റുകള് നിര്മിക്കുന്നത്. ഇലക്ട്രോണിക് കോര്പറേഷന് ഓഫ് ഇന്ത്യ 1400 യൂണിറ്റുകളും ഭാരത് ഹെവി ഇലക്ട്രിക്കല്സ് ലിമിറ്റഡ് 3400 യൂണിറ്റുകളും നിര്മിച്ചു. റീ പ്രോഗ്രാം ചെയ്യാന് സാധിക്കില്ലെന്ന് പറയുന്നത് തെറ്റാണെന്ന് ഹര്ജിക്കാര്ക്കുവേണ്ടി ഹാജരായ അഡ്വ. പ്രശാന്ത് ഭൂഷണ് ചൂണ്ടിക്കാട്ടിയെങ്കിലും കമ്മിഷന്റെ സാങ്കേതിക റിപ്പോര്ട്ടില് വിശ്വാസമുണ്ടെന്ന് കോടതി വ്യക്തമാക്കി.
യന്ത്രത്തിലെ സോഴ്സ് കോഡ് പരസ്യപ്പെടുത്താനാകില്ലെന്നും അത് ദുരുപയോഗം ചെയ്യാന് സാധ്യതയുണ്ടെന്നും ബെഞ്ച് നിരീക്ഷിച്ചു. തെരഞ്ഞെടുപ്പ് നിയന്ത്രിക്കാന് അധികാരമില്ല. തെര. കമ്മിഷനാണ് അതിനുള്ള അധികാരം. ഇവിഎം ശക്തമാക്കുന്നതിന് നിര്ദേശം നല്കാമെന്നും കോടതി ചൂണ്ടിക്കാട്ടി.
