മലപ്പുറം: പ്രായപൂര്ത്തിയാകാത്ത പെണ്കുട്ടികളെ പ്രണയം നടിച്ച് പാട്ടിലാക്കി മദ്യം നല്കി പീഡിപ്പിച്ച രണ്ട് യുവാക്കളെ പൊലീസ് പിടികൂടി. നെടുമ്പാശേരി കിടങ്ങയത്ത് ഹൗസില് ബേസില് ബേബി , തൃശ്ശൂര് കൊടുങ്ങല്ലൂര് കുന്നത്ത് ഹൗസില് മുഹമ്മദ് റമീസ് എന്നിവരെയാണ് വണ്ടൂര് പൊലീസ് പിടികൂടിയത്.
ഒമ്പത്, 10 ക്ലാസുകളില് പഠിക്കുന്ന സഹോദരിമാരെ ബൈക്കിലെത്തി കടത്തിക്കൊണ്ടുപോയി മദ്യം നല്കി പീഡിപ്പിച്ച കേസിലാണ് അറസ്റ്റ്.
വണ്ടൂരില് ബന്ധുവീട്ടില് താമസിക്കാന് എത്തിയ പെണ്കുട്ടികളെ ഇരുവരും ചേര്ന്ന് ബൈക്കില് ബെംഗളൂരുവിലേക്ക് കടത്തിക്കൊണ്ടു പോയി പീഡിപ്പിക്കുകയായിരുന്നു.കഴിഞ്ഞ 16നാണ് കേസിനാധാരമായ സംഭവം. ബന്ധുവീട്ടില് എത്തിയ കുട്ടികളെ കാണാതായതിനെ തുടര്ന്ന് കുട്ടികളുടെ ഇളയ അമ്മ വണ്ടൂര് പൊലീസില് പരാതി നല്കി. മൊബൈല് ഫോണ് കേന്ദ്രീകരിച്ചു നടത്തിയ അന്വേഷണത്തിലാണ് പ്രതികളെ കുറിച്ച് സൂചന ലഭിച്ചത്.
കൊടുങ്ങല്ലൂര് സ്വദേശിനികളായ പെണ്കുട്ടികള് പ്രതികളുമായി ഒരു വര്ഷമായി പ്രണയത്തിലായിരുന്നുവെന്ന് അന്വേഷണത്തില് കണ്ടെത്തി. ഈ അടുപ്പം മുതലെടുത്താണ് ഇരുവരും പെണ്കുട്ടികളെ ബാംഗ്ലൂരില് എത്തിച്ചത്. അവിടെ വച്ച് മദ്യം നല്കി പീഡിപ്പിക്കുകയായിരുന്നു. പിന്നീട് നാട്ടിലേക്ക് തിരിച്ചു വരവെ ആനമറി ചെക്ക് പോസ്റ്റില് വച്ച് പ്രതികളെ പൊലീസ് കസ്റ്റഡിയില് എടുക്കുകയായിരുന്നു. ഇരുവര്ക്കും എതിരെ പോക്സോ വകുപ്പുകള് ആണ് ചുമത്തിയത് . പ്രതികളെ മഞ്ചേരി കോടതിയില് ഹാജരാക്കി.
