ശിവസാഗർ: അസം റൈഫിൾസിന്റെ വാഹനത്തിന് നേരെ അജ്ഞാത സംഘത്തിന്റെ ആക്രമണം. സംഭവത്തിൽ ഒരു ഉദ്യോഗസ്ഥന് പരിക്കേറ്റു. അരുണാചൽപ്രദേശുമായി അതിർത്തി പങ്കിടുന്ന മാർഗരിറ്റയിലെ നംദാങ് മേഖലയിലാണ് ആക്രമണം നടന്നത്. തോക്കുധാരികളായ ഭീകരർ സുരക്ഷാ സേനയുടെ വാഹനത്തിന് നേരെ ആക്രമണം നടത്തുകയായിരുന്നു. സംഭവത്തിൽ അസം റൈഫിൾസ് ഉദ്യോഗസ്ഥന് പരിക്കേറ്റതായി അധികൃതർ അറിയിച്ചു.
പരിക്കേറ്റ ഇദ്ദേഹത്തെ വിമാനമാർഗ്ഗമാണ് ചികിത്സയ്ക്ക് വേണ്ടി എത്തിച്ചതെന്ന് അധികൃതർ വ്യക്തമാക്കി. ജോർഹട്ടിലെ മിലിട്ടറി ആശുപത്രിയിലേക്കാണ് അദ്ദേഹത്തെ മാറ്റിയത്. ഇന്ന് രാവിലെ 8.30-ഓടെയായിരുന്നു സംഭവം. ചാംഗ്ലാംഗിൽ നിന്ന് മാർഗരിറ്റയിലേക്ക് പോകുകയായിരുന്ന അസം റൈഫിൾസിന്റെ മൂന്ന് വാഹനങ്ങൾക്ക് നേരെയായിരുന്നു ആക്രമണം നടന്നത്. സൈന്യം തിരിച്ചടിച്ചതോടെ ഭീകരർ ആക്രമണത്തിൽ നിന്നും പിന്മാറി.
