തിരുവനന്തപുരം: കെഎസ്ആര്ടിസിയില് കൂട്ട നടപടി. മദ്യപിച്ച് ജോലിക്കെത്തിയ 100 കെഎസ്ആര്ടിസി ജീവനക്കാര്ക്കെതിരെയാണ് ഗതാഗത വകുപ്പ് മന്ത്രി നടപടിയെടുത്തത്. ഈ മാസം ഒന്ന് മുതല് 15 വരെ കെഎസ്ആര്ടിസി നടത്തിയ പ്രത്യേക പരിശോധനയുടെ ഭാഗമായാണ് നടപടി.
74 സ്ഥിരം ജീവനക്കാരെ സസ്പെന്ഡ് ചെയ്തു. സ്വിഫ്റ്റിലെ താല്ക്കാലിക ജീവനക്കാരും കെഎസ്ആര്ടിസിയിലെ ബദല് ജീവനക്കാരുമായ 26 പേരെ സര്വീസില് നിന്നും നീക്കി. രണ്ടാഴ്ച്ചയ്ക്കിടെ നടത്തിയ പരിശോധനയിലാണ് നടപടി. 49 ഡ്രൈവര്മാരും പരിശോധനയില് കുടുങ്ങി.
60 യൂണിറ്റുകളിലായി 1 സ്റ്റേഷന് മാസ്റ്റര്, 2 വെഹിക്കിള് സൂപ്പര്വൈസര്, 1 സെക്യൂരിറ്റി സര്ജന്റ്, 9 സ്ഥിരം മെക്കാനിക്ക്, 1 ബദല് മെക്കാനിക്ക്, 22 സ്ഥിരം കണ്ടക്ടര്, 9 ബദല് കണ്ടക്ടര്,1 സ്വിഫ്റ്റ് കണ്ടക്ടര്, 39 സ്ഥിരം ഡ്രൈവര്, 10 ബദല് ഡ്രൈവര്, 5 സിഫ്റ്റ് ഡ്രൈവര് കം കണ്ടക്ടര് എന്നിവരാണ് ഡ്യൂട്ടിക്ക് മദ്യപിച്ച് എത്തിയതായി വിജിലന്സ് വിഭാഗം പരിശോധനയില് കണ്ടെത്തിയത്.
വനിതകള് ഒഴികെയുള്ള മുഴുവന് ജീവനക്കാരെയും ബ്രീത്ത് അനലൈസര് ഉപയോഗിച്ച് പരിശോധിച്ച്, മദ്യപിച്ചിട്ടില്ലെന്ന് ഉറപ്പുവരുത്തി മാത്രമേ ജോലിക്ക് നിയോഗിക്കുവാന് പാടുള്ളൂ എന്നാണ് നിലവിലെ ഉത്തരവ്.
