നാടിന്റെ വികസനത്തിന് വേണ്ടി എല്ലാരും വോട്ട് ചെയ്യണം , രാത്രി നടത്തം സംഘടിപ്പിച്ച് ജില്ലാ കളക്ടർ 

കൊച്ചി : നാടിന്റെ വികസനത്തിനുവേണ്ടി എല്ലാരും വോട്ട് ചെയ്യണമെന്ന് ജില്ലാ കളക്ടർ എൻ.എസ്. കെ ഉമേഷ്‌. സ്വീപ് (സിസ്റ്റമാറ്റിക് വോട്ടേഴ്‌സ് എഡ്യുക്കേഷൻ ആൻഡ് ഇലക്ടറൽ പാർട്ടിസിപ്പേഷൻ) പ്രവർത്തനങ്ങളുടെ ഭാഗമായി തിങ്കളാഴ്ച സംഘടിപ്പിച്ച രാത്രി നടത്തം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

പോളിംഗ് ബൂത്തിൽ എല്ലാവരും തുല്യരാണ്. ജില്ലയിലെ 2294 പോളിംഗ് ബൂത്തുകളിലും കുടിവെള്ളം ഉൾപ്പെടെയുള്ള സൗകര്യങ്ങൾ ഒരുക്കും. വോട്ട് ശതമാനം വർദ്ധിപ്പിക്കുക എന്ന ലക്ഷ്യം മുൻനിർത്തി ജില്ലയിൽ സംഘടിപ്പിക്കുന്ന സ്വീപ് പ്രവർത്തനങ്ങളുടെ ഭാഗമായി വിവിധ മേഖലകളിൽ നിന്നായി 12 ഐക്കൺസിനെ തിരഞ്ഞെടുത്തിട്ടു ണ്ടെന്ന് കളക്ടർ പറഞ്ഞു.

‘വോട്ട് അവകാശമാണ്; ഒരു വോട്ട് പോലും പാഴാക്കരുത്’ എന്ന സന്ദേശം ഉയർത്തി എറണാകുളം ദർബാർ ഹാൾ മൈതാനിയിൽ നിന്നും ആരംഭിച്ച നടത്തം മറൈൻഡ്രൈവിൽ അവസാനിച്ചു. സിറ്റി പോലീസ് കമ്മീഷണർ എസ്. ശ്യാം സുന്ദർ നടത്തം ഫ്ലാഗ് ഓഫ് ചെയ്തു.

ജില്ലാ മജിസ്‌ട്രേറ്റ് ആശ സി എബ്രഹാം, സബ് കളക്ടർ കെ മീര, അസിസ്റ്റന്റ് കളക്ടർ നിഷാന്ത് സിഹാര, ഡെപ്യൂട്ടി കളക്ടർ വി അബ്ബാസ്, റസിഡന്റ്സ് അസോസിയേഷൻ ഭാരവാഹികൾ, ഉദ്യോഗസ്ഥർ തുടങ്ങിയവർ രാത്രി നടത്തത്തിൽ പങ്കെടുത്തു.