പാനൂര്: പാനൂരില് ബോംബ് നിര്മാണത്തിനിടെയുണ്ടായ സ്ഫോടന കേസില് കൂടുതല് വിവരങ്ങള് പുറത്ത്. പാനൂരില് ബോംബ് നിര്മിക്കാനുള്ള സ്റ്റീല് പാത്രങ്ങള് വാങ്ങിയത് കല്ലിക്കണ്ടിയില് നിന്നാണെന്ന് പോലീസ് അന്വേഷണത്തില് കണ്ടെത്തി. പ്രതികളായ ഷിജാല്, ഷബിന് ലാല് എന്നിവരാണ് കല്ലിക്കണ്ടിയില് നിന്ന് ബോംബ് നിര്മാണ വസ്തുക്കള് വാങ്ങിയതെന്നും വ്യക്തമായി.
ഷിജാല് ഡിവൈഎഫ്ഐ ഭാരവാഹിയാണ്. സ്ഫോടക വസ്തുക്കള് എവിടെ നിന്നാണ് എത്തിച്ചതെന്നത് സംബന്ധിച്ച് അന്വേഷണം നടക്കുകയാണ്. ബോംബ് സ്ഫോടനത്തിന് പിന്നാലെ, പാനൂരില് പോലീസ് നടത്തിയ പരിശോധനയില് എട്ടു സ്റ്റീല് ബോംബുകള് കണ്ടെടുത്തിരുന്നു. കൂടുതല് ബോംബുകള് നിര്മിച്ചിട്ടുണ്ടാകാമെന്നാണ് പോലീസിന്റെ വിലയിരുത്തല്. ബോംബ് നിര്മാണ സാമഗ്രികള് സ്ഥലത്തു നിന്നും മാറ്റിയതായി പോലീസ് സൂചിപ്പിക്കുന്നു.
പ്രതികള് ബോംബ് നിര്മിച്ചത് രാഷ്ട്രീയ എതിരാളികളെ ലക്ഷ്യമിട്ടാണെന്ന പോലീസിന്റെ റിമാന്ഡ് റിപ്പോര്ട്ട് കഴിഞ്ഞദിവസം പുറത്തു വന്നിരുന്നു.
ബോംബ് നിര്മാണത്തെ കുറിച്ച് മുഴുവന് പ്രതികള്ക്കും അറിവുണ്ടായിരുന്നു. ഡിവൈഎഫ്ഐ ഭാരവാഹികള് ഉള്പ്പെടെയുള്ളവര് തെളിവ് നശിപ്പിക്കാനും ശ്രമിച്ചു. ഡിവൈഎഫ്ഐ കൂന്നോത്ത്പറമ്പ് യൂണിറ്റ് സെക്രട്ടറി ഷിജാല് ആണ് മുഖ്യ ആസൂത്രകനെന്നും റിമാന്ഡ് റിപ്പോര്ട്ടില് വ്യക്തമാക്കിയിരുന്നു.
