പത്തനംതിട്ടക്കാരോട് അസൂയ തോന്നുന്നു..

ലോകം മുഴുവൻ ആരാധിക്കുന്ന സഖാവ് തോമസ് ഐസക്കിനെ ലോക്സഭ തിരഞ്ഞെടുപ്പ് സ്ഥാനാർഥി ആയി ലഭിക്കുക എന്നതിൽപരം ഭാഗ്യം വേറെ കിട്ടാനുണ്ടോ..
MLA യും, മന്ത്രിയും ആയിരുന്ന കാലയളവ് കൊണ്ട് ആലപ്പുഴയെ സിംഗപ്പൂർ ആക്കി മാറ്റിയ സഖാവ് പത്തനംതിട്ടയെ ന്യൂയോർക്ക് എങ്കിലും ആക്കും എന്ന് ഉറപ്പ്.. അത് മാത്രമോ വേസ്റ്റ് മാനേജ്മെന്റ്, ജൈവ കൃഷി അങ്ങനെ നൂറുകണക്കിന് ഐറ്റംസ് ഉണ്ട് സഖാവിന്റെ കയ്യിൽ…
പത്തനംതിട്ടക്കാർക്ക് എല്ലാവർക്കും ജോലി സഖാവ് ഉറപ്പാക്കി കഴിഞ്ഞു. അമേരിക്കയിലും, യൂറോപ്പിലും, കാനഡയിലും, ഓസ്ട്രേലിയയിലും, ഗൾഫ് നാടുകളിലും ഒക്കെ ‘ആട് ജീവിതം’ നയിക്കാൻ പത്തനംതിട്ടക്കാരെ ഇനി സഖാവ് അനുവദിക്കില്ല. എല്ലാ പ്രവാസികളും നാട്ടിലേക്ക് മടങ്ങാൻ ബാഗ് പാക്ക് ചെയ്തോളൂ..
കേരളത്തിന്റെ ധനമന്ത്രി ആയിരുന്നപ്പോൾ KSRTC യെ ലാഭത്തിൽ ആക്കുമെന്നു സഖാവ് പറഞ്ഞു, KSRTC ഇന്ന് ഇന്ത്യയിലെ ഏറ്റവും ലാഭം ഉള്ള പൊതുമേഖല സ്ഥാപനം ആയി. കേരളത്തിലെ എല്ലാ പൊതുമേഖല സ്ഥാപനങ്ങളെയും സഖാവ് ലാഭത്തിൽ ആക്കി.
സഖാവ് കൊണ്ടുവന്ന കെ ഫോൺ, കെ റെയിൽ, കെ സഫാരി, കെ ഹൈവെ, കെ വിമാനം, കെ കമ്പ്യൂട്ടർ, കെ ഹോട്ടൽ, കെ ചിക്കൻ എന്നിവയൊക്കെ ആഗോള കുത്തക കമ്പനികളെ തകർത്ത് മുന്നോട്ട് കുതിക്കുന്നു. കെ ഫോൺ വന്നതോടെ അംബാനിയുടെ ജിയോ പൂട്ടിപ്പോയി. വിഴിഞ്ഞം തുറമുഖം അദാനിയിൽ നിന്ന് ഊരാളുങ്കൽ ഏറ്റെടുത്തേക്കും.
സഖാവ് ധനമന്ത്രി ആയപ്പോൾ കേരളത്തിന്റെ പൊതു കടം ഏതാണ്ട് 1.6 ലക്ഷം കോടി രൂപ ആയിരുന്നു എങ്കിൽ സഖാവ് മന്ത്രി സ്ഥാനം ഒഴിയുമ്പോൾ അത് 4 ലക്ഷം കോടി രൂപയിൽ എത്തിച്ചു ലോകത്തെ അത്ഭുതപ്പെടുത്തി..!
സഖാവിന്റെ സർജിക്കൽ സ്ട്രിക്കിനെ കുറിച്ച് എങ്ങനെ പറയാതിരിക്കും.. ലോകത്തെ ഒരു സാമ്പത്തീക ശാസ്ത്രജ്ഞനും ഇതുവരെ പോകാത്ത വഴികളിലൂടെ സഞ്ചരിച്ച സഖാവ്, കേരളത്തെ ‘രക്ഷിക്കാൻ’ നിരന്തര ഗവേഷണങ്ങളിലൂടെ വികസിപ്പിച്ച പ്രസ്ഥാനമാണ് കിഫ്‌ബി..
ലോകം മുഴുവൻ നടന്നു കടം വാങ്ങാൻ സഖാവ് ഉണ്ടാക്കിയ കിഫ്‌ബി വഴി മസാല ബോണ്ടായി ലണ്ടൻ സ്‌റ്റോക്ക് എക്സ്ചേഞ്ചിൽ നിന്ന് എടുത്ത 2150 കോടി രൂപയുടെ 5 വർഷത്തെ പലിശയായി കേരളം 1045 കോടി രൂപ അടച്ചു എന്ന് കേൾക്കുമ്പോൾ നിങ്ങൾക്ക് കയ്യടിക്കാൻ തോന്നുന്നില്ലേ..
ഇന്ത്യയിലെ ബാങ്കുകൾ 8.5% നിരക്കിൽ കടം കൊടുക്കുന്ന കാലത്താണ് സഖാവ് ഏതാണ്ട് 9.73% പലിശ നിരക്കിൽ ലണ്ടണിൽ പോയി 2150 കോടി രൂപ കുത്തക മുതലാളിമാരിൽ നിന്ന് ലോൺ എടുത്ത് 7% പലിശക്ക്‌ ഇന്ത്യയിലെ സ്വകാര്യ ബാങ്കുകളിൽ ഉൾപ്പടെ നിക്ഷേപം നടത്തി ലോകത്തിലെ സാമ്പത്തീക വിദഗ്ധരെ ആകെ ഞെട്ടിച്ചത്..!
ഇത്രയും പ്രഗത്ഭനായ സഖാവ് തോമസ് ഐസക് കേരളത്തെ അമേരിക്കൻ നിലവാരത്തിൽ എത്തിച്ചത് പോലെ ഇന്ത്യയെയും എത്തിക്കും എന്നുറപ്പാണ്. സിപിഎംന് മാത്രമേ ബിജെപിയെ പുറത്തക്കാൻ ഇന്ത്യയിൽ കഴിയൂ എന്ന് പാർട്ടി തന്നെ പ്രഖ്യാപിച്ചിട്ടുള്ള കാര്യമാണ്. അങ്ങനെ വരുമ്പോൾ ഇന്ത്യയുടെ അടുത്ത ധനകാര്യ മന്ത്രി ആണ് സഖാവ് ഐസക്.
കേന്ദ്ര സർക്കാരിന്റെ കയ്യിൽ പണം ഇല്ലെങ്കിൽ RBI യുടെ കമ്മട്ടം വെച്ച് ആവശ്യത്തിന് പണം അച്ചടിച്ചാൽ പോരെ എന്ന് പരസ്യമായി പറഞ്ഞ് ലോകത്തിന്റെ കയ്യടി നേടിയ ഐസക്ക് സഖാവ് മരണ മാസ്സ് അല്ലേ..
സഖാവ് അടുത്ത കേന്ദ്ര ധനകാര്യ മന്ത്രി ആയാൽ, RBI ഇന്ത്യയിലെ എല്ലാ പഞ്ചായത്തുകളിലും നോട്ട് അടിക്കാൻ പ്രെസ്സ് തുടങ്ങും. അപ്പോൾ പിന്നെ എല്ലാവരുടെയും കയ്യിൽ ആവശ്യത്തിന് പണം ആകുമല്ലോ…
പത്തനംതിട്ടക്കാരെ, ഞങ്ങളുടെ സഖാവിനെ വെറും 5 വർഷത്തേക്ക് മാത്രമാണ് നിങ്ങൾക്ക് നൽകുന്നത്. ചങ്ക് പറിച്ചാണ് തരുന്നത്. സഖാവ് മിക്കവാറും മൂന്ന് കൊല്ലം കൊണ്ട് പത്തനംതിട്ടയെ ന്യൂയോർക്ക് ആക്കി മാറ്റും എന്നുറപ്പാണ്. അത് കഴിഞ്ഞാൽ സഖാവിനെ ഞങ്ങൾ ആലപ്പുഴക്കാർക്ക് തിരിച്ചു തരണേ…
Jithin K Jacob