മൂന്നുപതിറ്റാണ്ടു കാലത്തെ ജയില്‍വാസത്തിനും നിയമ പോരാട്ടത്തിനും ശേഷം രാജീവ് ഗാന്ധി വധക്കേസില്‍ കുറ്റവിമുക്തരാക്കപ്പെട്ട മൂന്നു മുന്‍ പ്രതികള്‍ സ്വദേശമായ ശ്രീലങ്കയില്‍ തിരിച്ചെത്തി. ഇന്ത്യയുടെ സുപ്രീം കോടതി മോചിപ്പിച്ച് ഏകദേശം രണ്ട് വര്‍ഷത്തിന് ശേഷമാണ്
ജയകുമാര്‍, മുരുകന്‍, റോബര്‍ട്ട് പയസ് എന്നിവരുടെ മടക്കം. സ്വദേശത്തേക്ക് മടങ്ങാന്‍ കാത്തിരിക്കുന്നതിനിടെ വൃക്ക തകരാറിലായി ചെന്നൈയില്‍ മരിച്ച സുതേന്ദ്രരാജ എന്ന ശാന്തന്റെ ഭൗതികാവശിഷ്ടങ്ങള്‍ മാര്‍ച്ച് ഒന്നിന് ശ്രീലങ്കയിലേക്ക് അയച്ചിരുന്നു.
കഴിഞ്ഞ മാസമാണ് ശ്രീലങ്ക ഇപ്പോള്‍ മടങ്ങിയ മൂന്നുപേര്‍ക്കും പാസ്‌പോര്‍ട്ട് അനുവദിച്ചത്. അതിനു പിന്നാലെ കേന്ദ്രസര്‍ക്കാരും യാത്രാനുമതി നല്‍കി.
2022-ലാണ് ഇവര്‍ ജയില്‍ മോചിതരായത്. മുന്‍ പ്രധാനമന്ത്രി രാജീവ് ഗാന്ധിയുടെ കൊലപാതകവുമായി ബന്ധപ്പെട്ട് മൂന്ന് പതിറ്റാണ്ടോളം ജയില്‍ ശിക്ഷ അനുഭവിച്ച മൂവരും തമിഴ്നാട്ടിലെ ചെന്നൈയില്‍ നിന്നാണ് സ്വന്തം നാട്ടിലേക്ക് മടങ്ങിയത്.
മുരുകന്‍, റോബര്‍ട്ട് പയസ്, ജയകുമാര്‍ എന്നിവര്‍ ചെന്നൈയില്‍ നിന്നുള്ള വിമാനത്തില്‍ ബുധനാഴ്ച രാവിലെ കൊളംബോ അന്താരാഷ്‌ട്ര വിമാനത്താവളത്തില്‍ എത്തിയതായി പോലീസ് ഉദ്യോഗസ്ഥര്‍ പറഞ്ഞു.
